– Go lea guottetáigi ja guovžžat leat lahkosis, de lea dego seamma go mánáid luoitit sisa njálggarámbuvrii, lohká guovžadutki.
– Go lea guottetáigi ja guovžžat leat lahkosis, de lea dego seamma go mánáid luoitit sisa njálggarámbuvrii, lohká guovžadutki.
Erenomaš prošeavttas GPS-rusttegiiguin guovžžain ja bohccuin lea dutki Ole-Gunnar Støen ja su joavku mihtidan man galle miesi guovža goddá.
Jiellevári guovllus leat eanemus guovžžat Ruoŧas. Boazosápmelaš Lars Thomas Person lei jo máŋggaid jagiid dieđihan ahte guovža goddá ruksesmisiid. Muhto ii okta ge váldán vuhtii su dieđuid.
– Ii okta ge guldal ovtta “lapp-jævela”. Danne fertiimet čoaggit dieđuid, lohka Person TV2:žii.
Norgga-Ruoŧa ovttasbargu
Sii válde oktavuođa guovžadutkiin Ole-Gunnar Støeniin. Ruoŧa Eanandoallouniversitehta ja Skandinávalaš guovžaprošeavtta ovttasbarggus álggii Støen viežžat dieđuid galle miesi guovža goddá.
– Go guovža lea misiid lahka, de lea dego mánáid luoitit njálggarámbuvrii, lohka Støen gii lea merken 23 guovžža ja 2600 bohcco GPS-rusttegiin.
Lea dan oanehis áiggi miessemánus go miesit leat hearkkimusat. Aitto šaddan misiin ii leat vejolašvuohta beassat eret nealgeguovžžas.
Ruoŧa eanadoallodepartemeanttas rahpasedje čalmmit go oidne rapportta.
Dat 23 merkejuvvon guovžža godde 335 miesi ja 18 álddu dan guovtti jagis go iske. 40 proseantta misiin šadde guovžabiebmun.
Doarvái duođaštusat
Dutkanrapporta čájehii ahte lei dárbu unnidit guovžalogu jus boazodoallu galggai birget. Dan geažil ožžo sámit báhčit eanet guovžžaid go ovdal.
– Dán dutkama haga ii livčče vejolaš čájehit eiseválddiide dáid váttisvuođaid. Lea jorgalan negatiiva ovdáneami dán báikkis, loahpaha Person.
