-Almmuhus-
-Almmuhus-
OĐĐASATGuovttis váidon veagalváldima ovddas

Guovttis váidon veagalváldima ovddas

-

-

Guokte njealjátlot-jahkásaš albmá dutkojuvvoba go navdoba leat veagalváldán muhtin nissona Kárášjogas.

Nu čállá Ságat báberáviisa odne.

 

Ságaha dieđuid mielde galgá dát dáhpáhuvvan muhtin feasttas miessemánu 1. beaivvi.

Nuorta-Finnmárkku politiijaguovllu politiijaadvokáhtta Jens Herstad jođiha dutkama ja duođašta ášši leat váidon, son dattege ii dáhto buktit eanet dieđuid.

Čuoččuhuvvo ahte albmáguovttos leaba ovttasráđiid veagalváldán nuorra nissona. Dakka maŋŋil gárttai dearvvašvuođadoaimmahat oažžut dieđu, nu iskkadedje nissona medisiinnalaččat ja teknihkalaš duođaštusat čohkkejuvvo. Dasto váidui ášši. Dasa lassin galget politiijat sihkarastán maiddái eará teknihkalaš duođaštusaid áššis.

 

Ávvir ii leat fáhten politiijaid ságaide dán áššis, iige nissona veahkkeadvokáhtta Lisbeth Enger Rønninga. Rønning lea Ságahii cealkán ahte ii dáhto ášši kommenteret vuos.

 – Ášši leat ain dutkamin, ja dieđuid fertet politiijain oažžut. Dákkár áššit leat obbalaččat váddásat. Mii fertet diktit geargat dutkamin ášši vuos, ja de oaidnit, dadjá Rønning Ságahii.

-Almmuhus-