Biila ja guorbmebiila beaškkeheigga oktii Heia davábealde Báhcavuona suohkanis. Guovllus lea gálja ja geaidnu lea borgon.
Romssa politiijaguovlu dieđihii lihkohisvuođa birra Twitteris badjelaš diibmu 16:00. Biila ja guorbmebiila beaškkeheigga oktii davábealde Heia, Báhcavuona suohkanis. Dearvvašvuođabargit báikkis duođaštedje logi minuhta maŋŋel ahte guovttis leaba duššan lihkohisvuođas.
– Guovttis geat čohkkáiba biillas leaba duššan. Mus eai leat dieđut guorbmebiilavuoddji birra, in ge dieđe leago roasmmohuvvon, lohká Romssa politiijaguovllu operašuvdnajođiheaddji Jøran Bugge.
Gálja geainnut
Romssa politiijaguovllu dutkit leat johtimin lihkohisvuođabáikái. Lea ain beare árrat dadjat manin lihkohisvuohta deaividii, muhto guovllus lea heajos siivu.
– Geaidnu lea gálja ja borgon, muitala Bugge.
Politiijat eai dieđe goas geainnu rahpet, muhto guovllus lea vejolašvuohta vuodjit eará geaidnoráiggi.
– Johtolat manná nu go dábálaččat, loahpaha Bugge.
