Guokte olbmo duššaiga lihkohisvuođas ja guovttis roasmmehuvaiga go njealje guorbmebiilla beaškkihedje oktii E6 geainnu alde Vuohppes Hábmera suohkanis gaskavahku eahkeda.
Dan guoktásis, geat duššaiga, lei nubbi sullii 30-jahkásaš ruoŧŧelaš gii ásai Nordlánddas ja nubbi almmáiolmmoš lei badjelaš 50-jahkásaš gii ásai Romssas, dieđihit Nordlándda politiijat. Njeallje olbmo ledje lihkohisvuođas.
Guokte dain njealji guorbmebiilla leat njunnálaga beaškkihan oktii.
– Dat guokte eará guorbmebiilla bohte máttabeale. Nubbi guorbmebiila beaškkihii duoid guorbmebiillaid maŋŋegeahčái mat ledje juo beaškkihan oktii. Njealját guorbmebiila nagodii mohkastit doaresbeallai, dieđihit politiijat.
Norgga vuojánat
Politiijat dieđihedje dán lihkohisvuođa gaskavahku eahkeda dii 22.32. E6 geaidnu giddejuvvui maŋŋel lihkohisvuođa. Diibmu 9.30 duorastaga álgge luoitit johtolaga meaddel lihkohisvuođabáikki.
