Karen Anne Buljo lea nominerejuvvon Davviriikkaid Ráđi 2020 mánáid- ja nuoraid girjjálašvuođabálkkašupmái girjjiin «Guovssu guovssahas».
Davvi Girjji lágádus almmuha ahte Karen Anne Buljo mánáid- ja nuoraidgirji, «Guovssu guovssahas» lea evttohuvvon Davviriikkaid ráđi 2020 mánáid- ja nuoraid girjjálašvuođa bálkkašupmái, dieđihit preassadieđáhusas.
«Guovssu guovssahas» lea gelddolaš sámi myhtalaš muitalus «dan váralaš čuovgga» birra. Sámi Siidda bearrašii gullet áhčči ja eadni ja mánát Joret, Risten ja unnavieljaš Guovssu. Mánát báhcet eahkes goahtái, go eatni guovttos áhčiin vuoddjába fitnat ealu luhtte. Mánát leat gildojuvvon mannamis olggos eaige ožžon luoitit goahtái geange gean eai dovdda. De bohtege amas cirkenjunát mánát ja bállahastaledje muohtačagiid goađi vuostá ja hástaledje ja hárddildedje Sámi Siidda mánáid dassážii go sii fillehadde vuolgit olggos stoahkat, vaikko eatni guovttos áhčiin leigga gieldán sin dahkamis dan.
Inga-Wiktoria Påve lea herven govaid girjjis. Lea gelddolaš máinnas mo guovssahasat ožžo nu olu ivnniid.
