Olgoriikalaččat, geat bohtet Davvi-Norgii, leat lassánan 378 proseanttain 2006 rájes, maŋŋel go Innovašuvdna Norga ja ovttasbargit garrasit márkanastigohte guovssahasaid.
Olgoriikalaččat, geat bohtet Davvi-Norgii, leat lassánan 378 proseanttain 2006 rájes, maŋŋel go Innovašuvdna Norga ja ovttasbargit garrasit márkanastigohte guovssahasaid.
Logi jagis leat idjadeamit lassánan 48 550 idjadeamis 231 900 idjadeapmái. Innovašuvdna Norga galgá dál geasuhit eanet turisttaid.
Buorre effeakta kampánjjain
– Guovssahaskampánnjain lea leamašan buorre effeakta. Ovttas Hurtigruteniin, Davvi-Norgga mátkefitnodagain ja Avinorain leat mii nagodan ovdánit ja jearru lassána sakka, mii ovdal ii lean nu bivnnut, muitala Innovašuvdna Norgga Merkevaren Norge direktevra Cathrine Pia Lund.
Vásihit oktii eallimis
Finnmárkkus lea turisma lassánan 188 proseanttain, Nordlánddas 253 proseanttain ja Romssas 618 proseanttain, go buohtastahttá 2006:in.
– Guovssahasvásáhus lea ollugiidda šaddan dakkár vásáhussan man ferte vásihit oktii eallimis. Mii oaidnit ahte guovssahasat Norggas leat ožžon ollu beroštumi internašunála mediain ja lea nammaduvvon okta buoremus luopmovásáhussan máilmmis. Dát lea posišuvdna man guvlui leat garrasit bargan ja mihttomearálaččat, čilge Lund.
Golahit ollu ruđa
Guovssahasturisttat leat bivnnuhis turisttat, go sii golahit eanet ruđa luomus go buohtastahttá eará turisttaiguin. Gaskamearálaččat geavaha guovssahasturista 2 560 ruvnno jándoris. Oktiibuot golahedje turisttat ovddit dálveáigodaga 1,6 miljárdda ruvnno Davvi-Norggas. Eanas englándalaččat ja duiskalaččat leat stuorimus oassi turisttain. Maiddái Itálias, Vuolleriikkas, USA:s, Spánias, Danmárkkus, Ruoŧas ja Kiinnás bohtet turisttat vásihit guovssahasaid.
