Guovlu- ja giella­viidodat ođđa Sámi prográmma­ráđis

Sámediggeráđđi lea nammadan ođđa lahtuid Sámi prográmmaráđi 2022-2025 áigodahkii.

Sámi prográmmaráđi bargun lea árvvoštallat ja evalueret NRK Sámi prográmmafálaldagaid.

– Lean duhtavaš Sámi prográmmaráđi oktiibidjamiin ja jáhkán ahte ráđđi rávve ja addá ávkkálaš neavvagiid mo dán áigodagas sáhtášii NRK Sápmi buoridit fálaldagaid. Lean ilus go dat ovddastit olles Sámi, ja ahte lahtut bohtet iešguđetge giellaguovlluin ja ahte sii gullet iešguđetge guovlluide, lohká sámediggeráđđi Maja Kristine Jåma (NSR) preassadieđáhusas. 

Jođiheaddji lea maiddái Sáddehatráđi lahttu

Prográmmaráđđi sáhttá meannudit olbmuid váidagiid mat gusket prográmmafálaldahkii ja sáddejuvvon prográmmaide. Sis lea sihke vuoigatvuohta ja geatnegasvuohta guldaleddjiid, gehččiid, ja lohkkiid ovddasteaddjin, rávvet mo prográmmafálaldaga sáhttá nannet ja buoridit.

– Dán áigodagas sávvá Sámediggeráđđi hábmet ollislaš sámi mediapolitihka ja ráhkadit mediadieđáhusa, ja Sámediggeráđđi jáhkká prográmmaráđi šaddat dehálažžan dan barggus, lohká Jåma.