Jus odne livčče leamaš válga, de livčče Guovddášbellodat ožžon láhtuid sihke Romssas ja Finnmárkkus. Dan čájeha ođđa oaiviliskkadallan NRK:s.
*/
Mannan válggain oaččui Guovddášbellodat 6,4 proseantta Romssa jienain ja 3,7 proseantta Finnmárkku jienain. Dat logut leat olu lassánan. InFact lea čađahan iskkadallama, ja Romssas oaččui Guovddašbellodat 17,2 proseantta ja 15,4 proseantta jienain Finnmárkkus. Dat mearkkaša ahte bellodat lea nubbin stuorámus dain fylkkain.
– Lea hirbmat somá oažžut dákkár dieđu. Trygve Slagsvold Vedum lea leamaš min guossis Álttás, ja lei somá sutnje dán muitalit. Lea geahpádus oažžut dákkár dieđu, lohká Geir Adelsten Iversen, bellodaga vuosttaškandidáhtta Finnmárkkus.
Livčče beassan Stuoradiggái
Dáinna mihtidemiin livčče Iversen oažžut saji Stuoradiggái, Romssa Sandra Borchain fárrolaga.
– Dá leat hirbmat buorit logut Guovddášbellodahkii, ja addá liige movtta válgagičču maŋemuš mánuide. Logut čájehit ahte olbmot leat ovttaoaivilis Guovddášbellodagain olu áššiin maid mii leat ovddidan, ja dat lea buorre, lohká Borch.
Bargiidbellodat lea liige stuorámus goappaš fylkkain. Romssas lea njiedjan ovttain proseanttain maŋemuš válggaid rájes, 30,2 proseantta. Finnmárkkus lea njiedjan njeljjiin proseanttain, 35,8 proseantta.(©NTB)
