Finnmárkku Guovddášbellodat ii hálit ahte fylkkat galget bákkus oktiičaskojuvvot, nu go Stuoradikki eanetlohku lea dál dieđihan.
Finnmárkku Guovddášbellodat ii hálit ahte fylkkat galget bákkus oktiičaskojuvvot, nu go Stuoradikki eanetlohku lea dál dieđihan.
Gaskavahku almmuhuvvui ahte Stuoradikki eanetlohku Olgeš, Ovddádusbellodat, Gurut ja Risttalaš álbmotbellodat háliidit juohkit Davvi-Norgga guovtti regiovdnan.
Finnmárku ja Romsa oktiičaskojuvvo, ja Nordlánda bissu nu go lea.
– Duohta máilmmis mearkkaša dat ahte Finnmárku heaittihuvvo ja bággehuvvo oassin Romsii, čállá Finnmárkku Guovddášbellodat preassadieđáhusas.
– Goaridit demokratiija
Geir Iversen lea vuosttaš kandidáhttan Stuoradiggái Finnmárkku Guovddášbellodagas. Son lea beahtahallan.
– Ráđđehus ja doarjjabellodagat eai beroš maid Finnmárku lea cealkán dán áššis, lean beahtahallan. Min oaivil ii mearkkaš maide. Dáinna lágiin goaridit demokratiija, lohká son.
– Eai leat čuvvon dábálaš vuogádaga, guorahallamiiguin ja gulaskuddamiiguin. Jus šaddá ođđa ráđđehus čakčii, mas Guovddášbellodat lea, boahtit jorgalahttit buot bággemiid suohkanreforpmas. Dát berre, galgá ja ferte guoskat fylkkaide maid, lohká Iversen.
Áigot bissehit
Romssa Guovddášbellodaga vuosttaš kandidáhtta Sandra Borch maid ii leat mielas.
– Mii vuosttaldit buot bággemiid maiddái regiovdnareforpmas, ja leat hui kritihkalaččat movt proseassa lea ovddiduvvon. Danne fertet dál searaid bidjat johtui vai sáhttit bissehit dán stuora reforpma, mii lea hoahpus ja hejot ráhkaduvvon. Dás ii leat fágalaš ii ge álbmotlaš vuođđu, lohká Borch.
– Reforbma ii leat gárvvis, ja das ii leat sisdoallu. Reforbma lea realitehtas duššo fylkkarájiid birra. Lea váidalahtti ahte Stuoradiggi duolbmu báikkálaš demokratiija dáinna lágiin, loahpaha Sandra Borch.
