Guovddášbellodaga Nancy Porsanger Anti, guhte lea nubbievttohas stuorradigge- ja sámediggeválgii, lea duhtavaš go Guovddášbellodat oažžu ovtta áirasa Stuorradiggái.
Vuosttaš prognosat stuorradiggeválgii ilbme diibmu 21:00 ja dat čájehedje ahte Guovddášbellodat oažžu ovtta áirasa Stuorradiggái.
Sámediggái orrot oažžumin guokte áirasa, mii mearkkaša ahte sis lea erenoamáš buorre válga.
Guovddášbellodaga Nancy Porsanger, Anti guhte lea nubbievttohas stuorradigge- ja sámediggeválgii, lea duhtavaš:
– Lea hui somá go mii leat siste Finnmárkkus Stuorradiggái ja ahte mis lea dál 10 proseantta. Dat logut leat hui buorit dál, go mii leat olles áigge leamaš gealdagasas nagodat go badjel 10, ja nu guhká go min mandáhtta lea siste, de lea hui buorre. Lea vahát ahte ii leat vel ođđa ráđđehus, muhto dat gal soaitá boahtit, dadjá son.
Guossit
Son lea bovden ustibiid guossái geahččat válgasáddagiid, son oainnat ii beassan vuolgit válgagohcimii go lea okto mánáiguin.
Kránnjá ja ustit Katri Somby leaikkastallá ja buohtastahttá válggaid «Game of Thrones» TV-ráidduin, go lea nu miellagiddevaš.
– Mun bealistan livččen háliidan ahte Norgii boahtá ođđa stivrejupmi. Galggašedje rievdat bohtosat, muhto mii birget mo dal de leaš, dat gal lea sihkar. Lea somá go Guovddášbellodat ovdána ja mii oaidnit «Nancy-effeavtta» dáppe Sis-Finnmárkkus, lohká Katri.
– Mii leat dat Nancy-effekta?
– Mun jáhkán ahte olbmot leat fuobmán Guovddášbellodaga politihka ja maiddái dat mearkkaša juoidá go lea sápmelaš dakkár bellodagas mii ovdána hui sakka, dadjá Katri.
Prognosaid mielde lea Guovddášbellodat ožžon 27,1 proseantta jienain Deanus, Guovdageainnus ožžo 36,3 proseantta ja Kárášjogas 37,4 proseantta, Porsáŋggus 14,1 proseantta ja Unjárggas 16,9 proseantta.
