-Almmuhus-
-Almmuhus-
OAIVILATGuovddáš­bellodaga sáme­politihkka Stuorra­dikkis

Guovddáš­bellodaga sáme­politihkka Stuorra­dikkis

-

-

Viimmat lea sámepolitihkka nannejuvvon olles stuorradiggeprográmmas. Guovddášbellodat lea mearridan ahte sámepolitihkka galgá lunddolaččat oidnot buot surggiin min áigumušain, čállá Nancy Porsanger Anti,  gii lea Finnmárkku Guovddášbellodaga stuoradiggeválgalisttu nubbeevttohas. 

Viimmat lea sámepolitihkka nannejuvvon olles stuorradiggeprográmmas. Guovddášbellodat lea mearridan ahte sámepolitihkka galgá lunddolaččat oidnot buot surggiin min áigumušain. Danin eai leat mis šat sirrejuvvon sámeáššit sierra kapihttalis, baicce oidnosis daid dihto kapihttaliin gosa gullet. Omd. leat sámi oahpponeavvut ja oahpaheaddjedárbu čallojuvvon oahpahuskapihttalii, dásseárvosaš dearvvašvuođabálvalusat sámiide healsokapihttalii, ja kulturmuittuid, Bååstede ja museat kulturkapihttalii.

Mii doaivut ahte dán láhkai sihkkarastit ahte sámi áššit loktejuvvojit Stuorradikkis, ja geatnegahttit daid luohttevašolbmuid maid mii válljet dihto komiteaide muitit maiddái sápmelaččaid.

Guovddášbellodagas lea nannejuvvon ahte mis leat iešguđetlágan bearrašat ja eallinvuogit, muhto ahte buohkain galget seamma vejolašvuođat. Mii sápmelaččat maid galgat beassat ovdánit ja ovdánahttit giela, kultuvrra, ealáhusaid ja servvodagaid.

Mii leat gergosat duođalaččat vuostái váldit Duohtavuođa- ja seanadankommišuvnna barggu, ja bargat doaibmabijuid ovdii mat sáhttet juobe muhtin muddui dahkat buori buot daid boasttuvuođaid ovdii maid garra dáruiduhttin lea dagahan.

Váibmogiella-NOU čuovvoleapmi lea viiddis bargu, ja erenoamážit sámegieloahpahus ferte oažžut buoret eavttuid ja reaidduid. Mii lea stuorra dárbu eanet sámegieloahpaheddjiide, ja buot oahppit Norggas fertejit oahppat eanet sámiid diliid birra. Sámi mánáidgárddit leat issoras dehálaččat giellaarenan, ja Guovddášbellodat áigu doarjut daid erenoamážit.

Maiddái dearvvašvuođasuorggis váilot bargit geain lea sámi giella- ja kulturmáhttu. SÁNAG- (sámi nationála gealboguovddáš psyhkalaš dearvvašvuođasuddjen ja sorjjasvuohta) barget hui buori ja dehálaš barggu. Sin erenoamáš kulturgelbbolašvuohta veahkeha sámiid rašes dilis. Guovddášbellodat áigu nannet ja viiddidit sin doaimma, vai sáhttet fállát veahki ain eanet olbmuide.

Obbalaččat leat Guovddášbellodagas nannejuvvon sámepolitihkalaš barggut mannan áigodagas, ja dan oaidnit maid das mo válggabiirriin dál leat sámi guovddášbellodatpolitihkkarat miehtá Norgga geat gilvalit beassat Sámediggái. Min sámepolitihkalaš ráđđi ja sámediggeáirasat deaivvadit dávjá min stuorradiggejoavkkuin, ja nu de lea áigumuš nagodit buori sámepolitihkka ovddidit sihke Sámedikkis ja Stuorradikkis veahkkálaga.

Mus lea alddán duogáš sámediggepolitihkkárin, ja dál lea maid vejolašvuohta beassat Stuorradiggái. Mun jáhkán mii ovddidit sámeáššiid buorebut jos min parlameanttat gulahallet bures, ja illudan viidásut áŋgiruššat sámi áššiid ovddideamis, gos dal de beasan dan dahkat.

 

 

-Almmuhus-