Guovddašbellodaga gielddastivraáirras Amund Peder Teigmo moaitá dál garrasit dispaáššiid mat leat beakkehan Kárášjogas.
Guovddašbellodaga gielddastivraáirras Amund Peder Teigmo moaitá dál garrasit dispaáššiid mat leat beakkehan Kárášjogas.
– Mun lean ieš vuohttán ahte dispalávdegoddi earuha olbmuid. Mu gánda ii ožžon disppa Njáhkájávrái, earát gal ožžo disppa Njáhkájávrái. Mus, geas lea beanavuodjin ealáhussan, gal ožžon disppa. Ii leat riekta jus dispalávdegoddi earuha olbmuid, ahte šaddá erohus olbmuid gaskkas, dadjá Teigmo.
Ii earuhit
Ávvir lea ge ovdal čállán dan birra go sátnejođiheaddji ja dispalávdegodelahttu leaba ožžon njealji jahkái sierravuodjinlobiid. Olusat leat ohcan Rávdojávrriide disppa, muhto eai ožžon, dainna ákkain ahte dohko manná čuoiganláhttu. Muhto go dispalávdegoddelahttu ieš ozai dohko, de oaččui sierra vuodjinlobi 2019:i. Amund Peder Teigmo ii liiko dasa go su bellodatustit sierravuodjenlohpelávdegottis lea ožžon njealji jahkái vuodjit Rávdojávrriide go seammás leat 13 earáide biehttalan.
– Kárášjogas ii galgga leat erohus «báhkára» ja «rávddi» gaskkas. Galget leat seamma njuolggadusat buohkaide, dadjá Amund Peder Teigmo.
Liberála gullevašvuođa vuođul
Kárášjoga sierravuodjinlohpelávdegotti jođiheaddji lea dadjan Ávvirii árabut, ahte muhtumat dispalávdegottis geavahit iežaset válddi alcceseaset buorrin.
– Vástidan dasa ahte buohkaide galget seamma njuolggadusat. Mu dihte aŋkke ii daga maidege jus lea veaháš liberála geain lea gullevašvuohta guvlui. Muhto dat ii mearkkaš ahte dan dihte galgá čavget earáide. Muhto diekkár praksis addit disppa máŋgga jahkái, dan in dohkket mun ge. Ii leat lága bokte ge dohkálaš, dadjá Teigmo.
Bellodatgullevašvuohta ii mearrit
Loahpas deattuha Guovddašbellodaga gielddastivraáirras ahte ii makkár ge áššemeannudemiin galgga bellodatgullevašvuohta váikkuhit mearrádusaide mat dahkkojit Kárášjogas.
– Buohkaid galgá meannudit seamma láhkái. Muđui manná buot boastut Kárášjogas. Šaddá apartheida servodat. Lea áibbas dohkketmeahttun, dadjá Amund Peder Teigmo.
