Mannan lávvordaga vuittii vuot okta guovdageaidnulaš miljovdnavuoittu Norsk Tippingas.
Mannan lávvordaga vuittii vuot okta guovdageaidnulaš miljovdnavuoittu Norsk Tippingas.
Lávvordateahkeda besse njeallje lihkolaš davvi-norgalačča ávvudit go vuite Lottos. Golmmas vuite 2 758 390 ruvnno Lotto dábálaš vuorbádeamis ja okta vuittii 1 161 290 ruvnno Superlottos. Okta dáin vuitiin leage guovdageaidnulaš, muhto ii oro juste dál Guovdageainnus. Nu šaddá ge son dan máŋgga guovdageaidnulačča searvái geat leat vuoitán miljovnnaid Norsk Tippingas.
Illá jáhkii
Vuoiti, gii ii hálit almmuhit namas, muitala iežas illá jáhkkán ahte lea vuoitán go Norsk Tipping riŋgii sutnje.
– Mun in jáhkkán ahte lei duohta, ja jurddašin muhtun mu oahppásiin dat lei tulljeme munnje. Gal mun de go isken dan tihppengoarttas daid nummariid, ja oidnen mu nummar dat lei gal, de easka jáhkken dasa, lohká son.
Fásta ráidduin vuittii
Vuoitti lea áŋgiris tihppejeaddji, ja son vuittii kupoŋŋain man lea vahkkosaččat speallan 12 jagi.
– Tihppejin Kárášjogas 12 jagi áigi ovtta eaŋkil ráiddu lottos, ja lean dan rájes álo tihppen dan seamma kupoŋŋa. Mus lea nubbi kupoŋŋa mas leat nu movt riegadanbeaivvit ja dihto tállat maid láven maid juohke vahkku tihppet. Dán vuoitokupoŋŋas gal eai mearkkaš tállat maidege, ovdal go dál, lohká son.
Illa bohte nahkárat
Vaikko lea áŋgiris tihppejeaddji, de ii leat son nu ollu niegadan ahte galgá vuoitit.
– In lea goassige jurddašan nu ollu dan birra ovdal. Go dál lean vuoitán, de ii leat áibbas mannan oaivái dat, ja in leat jurddašan masa áiggun golahit ruđa. Son mieđiha ahte vuosttaš ija maŋŋel go lei vuoitán illá rohttejedje nahkárat.