Guovdageainnus digaštallo alla jienain suohkanreforbma suohkanguovddážis. Sis dovdo ahte ii leat hállu Álttáin searvat, go dalle gal láhppo sámevuohta.
Guovdageainnus digaštallo alla jienain suohkanreforbma suohkanguovddážis. Sis dovdo ahte ii leat hállu Álttáin searvat, go dalle gal láhppo sámevuohta.
Suohkanreforbma lea hui áigeguovdilis ášši dáid beivviid, go dál leat Guovdageainnu, Álttá, Návvuona, ja Láhppi sátnejođiheaddjit bovden iežaset suohkanstivrraid Áltái. Doppe leat sii čoahkkinastán disdaga ja gaskavahku, ja fáddá lea leamašan oktii časkit dan njeallje suohkana. Vaikke leat sii diŋgon čielggadeami, movt livččii jus oktii servet dat suohkanat, de goitge leat olu gažaldagat maidda eai leat ožžon vástádusa. Sis lea birrasiid jagi dahkat mearrádusa áššis.
Vuosteháhku
Ávvir iskkai movt Guovdageainnu márkanguovddážis Guovdageainnu ássit oaivvildit suohkanreforpma birra. Sii dihtet bures ahte Guovdageainnu suohkanstivra lea čoahkkimis Álttáin suohkanreforpma birra. Leat olu garra oaivilat, measta aivve vuosteháhku, ja okta dain lea ahte jávká sámevuohta.
– Na mii gal jávkat Álttá vuollai jus singuin galgat ovttas ásahit ođđa suohkana. Mun goit in leat mielas dasa, in goit Álttáin, go movt de šaddá sámevuođain mis dáppe? bidjá gažaldatmearkka viessohoiddár Mikkel Anders Eira.
Ii leat šat mihkkege dadjamušaid
– Mun gal balan de gal sámegiella badjelgehččo nu ahte, eat mii leat de šat eat mahkke sin bálddas. Mis ii leat mihkke šat mihkkege dadjamušaid. Mun dovddan olu Álttá olbmuid ja dieđán máid oaivvildit, ja dan vuođul dajan dan, lohká Eira.
Son muitala maid aiddo leamaš Álttájogas luosa bivdime.
– Doppe maid bessen gullat ahte eat galgga bahkket dohko sin johkii, muitala Eira.
Akto stivret
Guovdageainnu sátnejođiheaddji, Klemet Erland Hættas, ii maid oro nu jáhkku Álttáin searvat ja ásahit oktasaš suohkana, go son dajai NRK Sápmái ahte son jáhkká ain jagi geahčen lea Guovdageainnu suohkanis iežas sátnejođiheaddji. Son ballá ahte sámevuohta láhppo jus šaddá dakkár stuora suohkan, nu mo dál leat čielggadeame. Dasa ii sáhte son dušše čohkkát ja miehtat.
– Jáhkán diet lea dat stuorimus hástalus dákkár ovttasbarggus, dajai son NRK Sápmái.
Ovdal Kárášjogain
Mikkel Anders Eira lohká sii baicce berrešedje geahččat Kárášjoga guvlui, jus fal galgá searvat stuoridit suohkana rájiid.
– Kárášjohka lea olu eambbo sullii min, ja doppe lea maid sámevuohta guovddážis, seamma go mis. Jáhkán dat livččii baicce molssaeaktu midjiide, ovdalgo Áltá, lohká son vel loahpas.
(Ášši lea almmuhuvvon báberaviissas 13.08.15)
