-Almmuhus-
-Almmuhus-
-Almmuhus-
OĐĐASATGuovdageainnus ođđa spábbáčiekčangilvu

Guovdageainnus ođđa spábbáčiekčangilvu

-

-

It dárbbaš ballat ahte ii šatta spábbačiekčangilvu Guovdageainnus dán jagi, maŋŋel go NilutCup loahpahuvvui diibmá.

Guovdageainnu valáštallansearvvi seniorjoavku lea váldán barggu lágidit ođđa spábbačiekčangilvvu mii boahtá leat skábmamánus.

– Mii áigut addit fálaldaga spábbačikčiide dál go ráidočiekčamat leat nohkan.  Buohkain galgá leat vejolašvuohta searvat čiekčamiidda, leaš dál ráidojoavku dahje seaguhus joavku, dadjá Svein Ole Sandvik Guovdageainnu valáštallansearvvis.

Nammagilvu

– Mis lea gilvu nama gávdnat. Leamašan NilutCupa, muhto mii fertet eará nama gávdnat, dadjá Sandvik.

Son muitala ahte leat almmuhan iežaset Facebook siiddus nammagilvvu.

– Olbmot ožžot evttohit nama cupai ja mis boahtá leat vuoitu nammagilvvus, muhto eat áiggo vuos muitalit mii dat lea. Čoahkkimis mii galgat geahčadit ja árvvoštallat nammaevttohusaid, ja nammadit maid vuoiti gilvvus.

Sandvik dadjá ahte fitnodagain maid lea vejolašvuohta oastit cupa, ja dainnalágiin nammaduvvo cupa fitnodaga nammii.

– Nu ahte mii leat hui rahpasat juohke tiŋgii, muitala Sandvik.

Earálágan go NilutCupa

– Čiekčamat šaddet earálágan, NilutCupas lei futsalčiekčan, muhto mii boahtit čiekčat dábálaš five the side, nu go NilutCupa álggii. Šaddá dábálaš spábbačiekčan, dadjá Sandvik.

Vuoittut leat nu go NilutCupas leamašan, 10 000 ruvnnu, 5000 ruvnnu ja 3000 ruvnnu.

Čiekčamat streamejuvvojit

– Mii álggiimet plánet maŋŋel go NilutCup heaittihuvvui, go de hoigaduvvui spábba midjiide. Mii leat ságastallan mo mii galgat dahkat ja leat álgán goarrut čoahkkái prográmma.

Son dadjá ahte leat ožžon Altapostena ovttasbargui, mii galgá streamet čiekčamiid ja veahkehit diehtojuohkimiin. 

– Mis dat gal leat vuordámušat ahte oažžut joavkkuid mielde, ahte olu olbmot bohtet geahččat ja ahte mii galgat suohtastallat ovttas dán vahkkoloahpa, loahpaha Sandvik.

-Almmuhus-