-Almmuhus-
OĐĐASATGuovda­geainnus korona: – Olbmot eai dárbbaš ballat

Guovda­geainnus korona: – Olbmot eai dárbbaš ballat

-

-

Sátnejođiheaddji Hans Isak Olsen dáhkida váldodoaktára dieđuid vuođul ahte sii eai bala dávdda leavvamis Guovdageainnus.

Guovdageainnus bođii odne gaskavahkku diehtu ahte suohkanis lea duođaštuvvon okta koronabuohcci. Sátnejođiheaddji Hans Isak Olsen lohká ahte su dieđuid mielde koronabuohcci galgá leat boahtán Ruoŧa bealde rukses guovllus, ja galgá leat ieš mannan iskosa váldit go lea boahtán Guovdageidnui.

Sátnejođiheaddji ii loga ožžon čielga dieđuid koronabuohcci birra, muhto lohká ahte sis lea kontrolla njoammumiin.

– Koronabuohcci ii galgga mu dieđuid vuođul leamaš oktavuođas olbmuiguin Guovdageainnus, ja galgá ieš mannan iskosa váldit go bođii báikái, lohká Guovdageainnu sátnejođiheaddji Hans Isak Olsen.

Sátnejođiheaddji muitala ahte koronabuohcci lea isolašuvnnas oktan olbmuiguin geat orrot seamma viesus, ja ahte buohkat viesus galget leat váldán iskosa. Olsen dáhkida Guovdageainnu váldodoaktára dieđuid vuođul ahte eai bala dávdda leavvamis.

– Mus eai leat buot dieđut, muhto min váldodoavttir lohká ahte son ii bala dávdda njoammut, mun luohtán sutnje maid son lohká, muitala sátnejođiheaddji Hans Isak Olsen. 

-Almmuhus-