Finnmárkkus njiedja bargguhisvuohta, ja dál 1333 olbmo leat registrerejuvvon NAVas áibbas barggu haga, mii lea 117 unnit go diibmá seamma áiggis.
Finnmárkkus njiedja bargguhisvuohta, ja dál 1333 olbmo leat registrerejuvvon NAVas áibbas barggu haga, mii lea 117 unnit go diibmá seamma áiggis.
– Ii leat leamaš lihka unnán bargguhisvuohta borgemánus 2012 rájes. Mis leat unnit virgeluomut ja máŋgga suohkaniin lea njiedjan bargguhisvuohta, muitala seniorráđđeaddi NAV Finnmárkkus Eva-Lill J. Margit preassadieđáhusas.
Eanemus proseanttaid mielde
Finnmárkkus almmuhuvvoje loahpas borgemánu 346 rabas virggi. Eanaš lea oassi dain leat dearvvašvuođa, dikšun- ja fuolahus-, oahpahus- ja gávpesurggiin. Proseanttaid mielde lea eanemus lassáneapmi bargofálaldagain lea Guovdageainnus, Davvinjárggas ja Porsáŋggus.
Bargguhisvuohta Finnmárkkus lea loahpageahčen borgemánu 3,3 proseantta bargoveagas. Olles riikas lea bargguhisvuohta 3,1 proseanta.
Buorit áiggit huksensuorggis
Skuvllaid ja mánáidgárddiid álgin maŋŋel geasi dagaha ahte oahpahussuorggis njiedja bargguhisvuohta. Dilli huksen ja ráhkadussuorggis lea maid buorre ja dagaha unnánit bargguhisvuođa fylkkas, lohká Margit.
– Sihke gávpogiin ja giliin leat huksenprošeavttat jođus. Huksejuvvot geainnut, skuvllat, hápmanat ja faláštallanhállat. Orrot leamen buorit vejolašvuođat oažžut barggu huksen ja ráhkadussuorggis ovddasguvlui, lohká Margit. Doaimmat huksen ja ráhkadussuorggis buktet maid lassiváikkuhusaid ealáhusaide mat fállet idjadeami ja guossoheami, lasihastá son.
Industriijas eanemus barggu haga
Bargosuorggit main eanemus njidje bargguhisvuohta lea industriija, 59 unnit barggu haga. Gávpi– ja vuovdinbargu, 31 unnit ja eanandoallu,vuovdebargu ja guolásteapmi, 28 unnit olbmo barggu haga. Industriijabargit leat ain bargojoavku Finnmárkkus mas leat eanemus registrerejuvvon barggu haga, 274 olbmo.
Unjárggas unnán bargguhisvuohta
Várggáin lea eanemus bargguhisvuohta Finnmárkkus, 6,1 proseanta ja nubbin Gáŋgaviika 5,9 proseanta. Unnáneamos bargguhisvuohta lea Álttás, 2,2 proseanta ja Unjárga 2,4 proseanta.
