Guovdageainnus lea eanemus bargguhisvuohta fylkkas, ja unnimus ges lea Bearalvágis.
Guovdageainnus lea eanemus bargguhisvuohta fylkkas, ja unnimus ges lea Bearalvágis.
Bargguhisvuohta Finnmárkkus lea njiedjan diimmáža rájes 0,2 proseanttain. Finnmárku lea okta dain guđa fylkkain Norggas gos bargguhisvuohta lea njiedjan.
– Mii oaidnit unnit bargguhisvuođa huksenbargguin, rámbuvra ja vuovdinsuorggis, ja dearvvašvuođa ja fuolahussuorggis. Illudahtti lea go bargguhisvuohta njiedjá nuoramusaid gaskkas, lohká Eva-Lill Johansen Margit NAV Finnmárkkus.
Margit muitala ahte sii leat ollu návccaid bidjan unnidit bargguhisvuođa nuoraid gaskkas, ja veahkehan sin bargguid gávdnat dahje oahpu čađahit.
Industriija ja bálvalussuorggis lea eanemus bargguhisvuohta.
Rabas virggit lassánan
Finnmárkkus ledje 485 rabas virggi cuoŋománu, mii lea 15 proseanta eanet go diibmá cuoŋománu. Eanaš virggit leat Álttás (113) ja Hammerfeastas (49). Davvesiiddas, Bearalvágis ja Muosáhis leat unnimusat almmuhan rabas virggiid.
– Eanaš barggut leat dearvvašvuođas, fuolahussuorggis, oahpahusas, akademalaš virggit ja eará bálvalusvirggit, muitala Margit preassadieđáhusas.
Alimus ja unnimus
Guovdageainnus lea alimus bargguhisvuohta 6,7 proseanttain. Várggáhis ges 5,8 proseantta ja Davvinjárggas 5,7 proseantta. Bearalvágis lea dušše 1,4 proseantta ja Unjárggas ges 1,9 proseanta bargguhisvuohta.
