Maŋimuš vahkkuid leat badjel 19 000 njealját luohkáhasa miehtá Norgga čohkken geavahuvvon batteriijaid ávnnasmáhcaheapmái. Oktiibuot časke buot ovddeš olahusaid ja čohkkejedje olles 138 tonna batteriijaid.
Máŋga njealját luohká Romssa ja Finnmárkku skuvllas leat leamaš mielde «Batterijakten» gilvvus ja oallugat sáhttet čevllohallat bohtosiiguin.
– Mii oaidnit ahte dát lea dakkár kampánnja mas mánát duođaid beroštit. Oahppit leat leamaš čeahpit, ja muhtimat leat gurren buot geavahuvvon batteriijaid lagasbirrasis. Riikka njealját luohkáhasat leat čájehan ahte biras lea juoga mas beroštit, dadjá Birasageanttaid prošeaktajođiheaddji Ingvild Swane.
Eanemus batteriijaid čogge Kila skuvlla 4 A luohká oahppit Hársttáin. 17 oahppi čogge gaskamearálaččat 65 kilo guhtege ja oktiibuot 1102 kilo.
Guovdageainnu mánáidskuvlla 4A luohkká lei maid mielde gilvvus, muhto sii eai čoaggán ovttage batteriija.
