Rievssatnálli lea unnon Norggas, muhto ii fal davvin. Guovdageaidnu lei diibmá buoremus rievssatbivdosuohkan olles Norggas.
Rievssatnálli lea unnon Norggas, muhto ii fal davvin. Guovdageaidnu lei diibmá buoremus rievssatbivdosuohkan olles Norggas.
Maŋŋel go guokte jagi ledje buorránan rievssatlogut olles Norggas, de unno logut fas mannan čavčča ja dálvvi, dahje 2015/2016 bivdojagi.
Dušše guovtti davimus fylkkain, Tromssas ja Finnmárkkus gal báhče eambbo rievssahiid go ovddit jagi.
– Dain fylkkain gos ovdal leat báhčán ollu rievssahiid, njidje logut. Eanemusat njidje Hedmark, Oppland, Lulli-Trøndelága ja Nordlándda fylkkain. Máŋgga guovllus dáin fylkkain ledje gal rievssahat maid ráfáidahtton, ja ledje gáržžidan bivdiid logu ja man olu lei lohpi báhčit beaivvis, čállá SSB.
Buot eanemusat njidje logut Hedmark fylkkas, gos mannan jagi báhče 79 proseantta unnit go jagi ovdal.
Finnmárkkus lassánedje
Muhto Finnmárkkus gal lassánedje rievssatlogut.
Doppe báhče oktiibuot 51.000 rievssaha, mii lea 74 proseantta lassáneapmi.
Dušše Guovdageainnus báhče oktiibuot 12.600 rievssaha. Guovdageaidnu šattai dasto buoret rievssatbivdosuohkanin go Gálssa suohkan, mii lei leamaš buoremussan dan ovdal.
Gálssa suohkanis báhče diibmá 10.200 rievssaha, ja Tromssa fylkkas báhče oppalaččat 46.000 rievsaha diibmá, mii lea 22 proseanta lassáneapmi.
Statistihka guovddášdoaimmahaga (SSB) loguid mielde báhče Norggas 175.000 rievssaha 2015 /2016 bivdojagi. Das ledje 111.000 rievssaha ja 64.000 girona.
(Gáldu: NTB)
