Guovdageainnus álgán merket luovosbeatnagiid

Guovdageainnu leans­mánnekantuvra lea álgán merket ivnniin luovosbeatnagiid mat bohtet sin háldui, dál árvvoštallá Kárášjoga leansmánne geavahišgoahtit seamma vuogi.

Guovdageainnu leansmánne Klemet Klemetsen, muitala sis leamašan guhkkit áigge luovosbeanaváttisvuohta, ja eanaš beatnagiin ii gávdno eaiggát.

– Mii váldit beatnagiid gitta, ja jus beanaeaiggát ii viečča beatnaga, de min čoavddus ii leat gávdnat bearráigeahčči beatnagiid, mii leat baicce eará vuogi gávdnan. Mii merket beatnaga, cirgguhat ivnniin ja merket nummariin vai diehtit leamašan go dát beana min hálddus, jus nuppes váldo gitta, ja vai diehtit sihkkarit lea go beatnagis eaiggát vai ii. Nie álkida maid vejolašvuođa geavahit lága, gos sáhttit fállat earáide beatnaga dahje jávkadit dan, lohká Klemetsen.

 

Árvvoštallá čuovvolit ránnjá suohkana
Kárášjoga leansmánnekantuvra lea maid guhkkit áigge rahčan ollu luovosbeatnagiiguin, ja leat earret eará viggan álgovuorus čoavdit dili sáhkohit beanaeaiggádiid, geat eai doahttal veaddit beatnagiid. Dál lohká Kárášjoga leansmánne Kjell Magne Grønli iežas árvvoštallamin čuovvolit Guovdageainnu, ja merkegoahtit luovosbeatnagiid mat šaddet politiija háldui.

– Fertet geahččalit buot ­vejolašvuođaid, dassái go olbmot álget veaddit beatnagiid. Muhtin ássanguovlluin lea olles valvi, njeallje- guhtta beatnaga fárro­lága. Okta vuohki lea merket beatna­giid ivnniin, oažžun dihte olbmuid veaddit beatnagiid. Ammal jo eai hálit oainnáhallat ránnjáide ahte su beana leamašan politiijaid hálddus, lohká Grønli.

 

Unnit váidagat boahtán
Guovdageaidnu leansmánne Klemet Klemetsen, muitala mearkkašahtti unnit váidagat boahtán maŋŋá go álge sprájjet luovosbeatnagiid, ja lohká dál lea hui álki čuovvut beatnagiid mat leamašan ovdal politiija hálddus.

Ovtta merken, vuohttá ávkki
Guovdageainnu leansmánnekantuvra lea dássážii merken ovtta beatnaga ruoksadin.

– Mii leat ovtta sprájjen, dan rájes eat leat gullan eat ge ožžon váidagiid. Olbmot orrot vuhtii váldán ahte mii merket, ja sáhttet álkit oaidnit lea go ránnjá beana leamašan golgosis. Orro ávki dán čovdosiid, eai leat nu ollu luovosbeatnagat šat, lohká Klemet Klemetsen.

Dohkkehuvvon elliide
Son deattuha, ivdnecirgganasa maid geavahit lea dohkkehuvvon elliide, ja merkejit gilgii vai lea hui oidnosis.

– Oidno hui bures, leat merken ruoksadin. Nu oidno čielgasit lea go beana leamašan min gaccaid gaskkas, lohká son.