-Almmuhus-
OĐĐASATGuovdageainnus ain eanemus bargguid haga

Guovdageainnus ain eanemus bargguid haga

-

-

Guovdageainnus lea ain eanemus bargguhisvuohta Norgga davimus fylkkas.

NAV Finnmárkku logut čájehit ahte Guovdageainnus lea čieža proseanta barggu haga, mii lea buot eanemus olles Finnmárkkus. Ákŋoluovttas lea nubbin eanemus bargguhisvuohta, namalassii vihtta proseanta.

Liikká niedjá goappašat suohkaniin bargguhisvuohta go buohtastahttá diimmá suoidnemánu loguiguin.

Unnimus bargguhisvuohta lea Fálesnuoris gos ii leat bargguhisvuohta eará guokte proseanta. Porsáŋggus ja Unjárggas maid eai leat eará golbma proseanta barggu haga.

 

Fylkkas muđui lassána

Ovddit mánu ektui aŋkke lassánii olles Finnmárkkus bargguhisvuohta 152 olbmuin, ja dán mánu loahpageahčen ledje 1431 olbmo dieđihuvvon NAV Finnmárkui barggu haga.

Muhto dat lea seamma mađe go diibmá seamma mutto áiggis.

Dál leatge Finnmárkkus 3,6 proseanta barggu haga ja riika gaskamearalaš lohku lea ges 3,2 proseanta.

 

Lassáneapmi stuora suohkaniin

Lea dain stuora suohkaniin, nugo Álttás, Hámmárfeasttas ja Čáhcesullos, gos leat eanemus olbmot gártan barggu haga, earret Mátta-Várjjat gos barggut leat lassánan go doppe leat eambbo barggut huksensurggiin.

Eanemusat geat leat barggu haga leat dievddut gaskal 20-29 jagi.

Dál leat Finnmárkkus 372 virggi almmuhuvvon, mat leat eanaš buohccidivššár– ja vuođđoskuvllaid oahpaheaddji virggit.

 

 

 

 

 

 

 

 

-Almmuhus-