Guovdageainnu suohkana roassojoavku lea doallan čoahkkima ja mearridan ahte ii láigot lanjaid doaluide, čoahkkimiidda ja kurssaide gos vurdet eará suohkaniid oasseváldiid boahtit.
Dat mearkkaša ahte buohkat geaidda lea lohpiduvvon láigohit lanja Guovdageainnu suohkanis 44. vahkku rájes ja dán jagi lohppii, sin várrejumit leat sihkkojuvvon, čállá suohkan iežas ruovttusiiddus.
Arvoštallet
Jus sáhttet duođaštit ahte oasseváldit leat olbmot geat orrot Guovdageainnus, ja barget Guovdageainnus, de sáhttá árvvoštallat doalahit várrejumi.
Guovdageainnu suohkan ii váldde vuostá eará báikkiid gussiid go Guovdageainnu, dat guoská buot suohkana ovttadagaide. Vejolaš spiehkastemiid ferte njoammunsuddjendoaktáriin soahpat.
Gildet johtimis
Guovdageainnu suohkan lea maiddái, suohkanbargiid ja sin barggu dáfus, bissehan mátkkoštemiid rukses riikkaide ja suohkaniidda gos njoammun leavvá ollu. Jus olbmot lagas bearrašis leat leamaš olgoriikkas, de fertejit mannat 10 beaivái erremii ruovttus ja iskojuvvot dárbbu mielde.
Doaibmabijut
Čoahkkin lei mannan bearjadaga ja dollui go ráđđehus lea almmuhan ođđa doaibmabijuid hehttet njoammuma leavvamis, mii lea lassánan borgemánu rájes.
