Guovdageainnu suohkan lea Ymber AS oasseeaiggát ja oaivvilda ahte fitnodat berre geassádit bieggafápmoprošeavttas mii sáhttá roassun suohkana boazosápmelaččaide.
Troms Kraft ja Ymber AS čađahit vejolašvuođaguorahallama Davvi-Romssas, áigumuššan livččii lasihit el-fápmobuvttadeami ja ásahit guvlui bieggaturbiinnaid.
Guovdageainnu suohkan lea Ymber AS mieleaiggát ja dasa lassin leat suohkanis olu boazosápmelaččain geasseorohagat Davvi-Romssas. Dan olis mearridii suohkanstivra njukčamánu 30. beaivvi cealkámuša bieggafápmoplánaide, čállá Guovdageainnu suohkan preassadieđáhusas.
Guovdageainnu suohkana cealkámuš:
Čujuhuvvo bieggafápmohuksema vejolašvuođaguorahallamii Davvi-Romssas man duogábealde leat Troms-kraft ja Ymber AS. Guovdageainnu suohkan hui ládje vuorjašuvvá ja moaitá bieggafápmoprošeavtta Davvi-Romssas, mat leat guovddáš ja mávssolaš guohtunguovllut ollu oarjejohtolaga siiddaide Oarje-Finnmárku boazoguohtunguovllus.
Bieggafápmorusttegat oktan vuođđostruktuvrrain ja muosehuhttimiiguin bohtet háldogáržžidit ollu guohtuneatnamiid ja mielddisbuktit nuoskkideami luonddubirrasis. Váikkuhusat šaddet mearihis roassun siiddaide maidda guoská ja dagaha nai stuora váikkuhusaid Oarje-Finnmárku boazodollui.
Plánejuvvojit nai bieggafápmorusttegat eará guovlluide mat gullet Oarje-Finnmárkku boazoguohtunguvlui. Boazoealáhus lea stuorámus ealáhus min suohkanis, daningo boazodoalus barget hui ollugat, ja eará ealáhusain geat lágidit fas boazodollui. Boazodoallu lea mávssolaš árvoháhkki ja kulturguoddi.
Fovsenášši vuođul ii galgga čiehkat ge ahte gártá seamma dillái Davvi-Romssas jus bieggafápmoplána duohtandahkko, ja ii oktage fal háliit identifiseret iežas dainna. Ymber AS mieleaiggádin, Guovdageainnu suohkan berošta ollu das ja lea hui dárkil dan dáfus movt min eaiggátvuohta hálddašuvvo fitnodagas. Mii bivdit Ymbera ođđasit árvvoštallat searvama bieggafápmoprošektii.
Guovdageainnu suohkanstivra ávžžuha Ymbera loahpahit áŋgiruššama bidjat dán prošektii.
