Guovdageainnu politihkkáriin ii oro miella searvat Álttáin ásahit oktasaš suohkana, muhto ii leat gal miella searvat Kárášjogain ge. Nu lohká Guovdageainnu johttisápmelaččaid listtu njunuš.
Guovdageainnu politihkkáriin ii oro miella searvat Álttáin ásahit oktasaš suohkana, muhto ii leat gal miella searvat Kárášjogain ge. Nu lohká Guovdageainnu johttisápmelaččaid listtu njunuš.
Disdaga ja gaskavahku ledje Áltá-, Láhpi-, Návvuona-, ja Guovdageainnu suohkanstivrrat čoahkkanan Áltái, gullan dihtii makkár hástalusat leat jus dat njeallje suohkana livčče galgat searvat oktii ja ásahit ovtta stuorra suohkana. Guovdageainnu suohkanpolitihkkárat geaiguin Ávvir lea hupman, eai leat beare mielas searvat diekkár stuora suohkanii. Ievttá Ávviris lei maid Guovdageainnu ássi, Mikkel Anders Eira, vuostá Álttáin searvat. Son baicce evttohii Kárášjogain searvat, jus galgá searvat, go dat guokte suohkana leat eambbo ovttaláganat ja gos sámevuohta lea guovddážis.
Ii Kárášjohka
Guovdageainnu johttisápmelaččaidlistu suohkanstivrra áirras ja sátnejođiheaddji evttohas válgii čakčat, Anders S. Buljo, ii mieđa gal ahte Kárášjohka lea dat rivttes suohkan searvat, jus galgá searvat. Son gal baicce geahčesta Láhpi ja Návvuona guvlui.
– Stuorra oasis Guovdageainnu álbmogis leat juo olu dahkamušat Návvuonain ja Láhpin, go doppe orrot olu sápmelaččat geassebotta, dadjá son. Buljo oaivvilda ge boazosápmelaččaid geat giđđat johtet justte Návvutnii ja Láhppái, ja orrot geasi dan guovtti suohkanis.
- Kárášjohkii heivešii fas bures dien dáfus searvat Porsáŋgguin, gosa olu boazosápmelaččat johtet, lohká Buljo.
Guorahallat fárrolaga Guovdageainnuin
Dađibahábut, de lea Kárášjohka geahčestan juste Guovdageainnu guvlui go galget guorahallat vejolašvuođaid searvat ja ásahit ovtta stuorra suohkana. Kárášjoga sátnejođiheaddji, Anne Toril Eriksen Balto, muitala ahte leat dušše guokte suohkana Finnmárkkus geain lea suohkanstivrramearrádus ahte galget čielggadit nuppiin eará suohkanin, ja Kárášjogas leat dadjan galget čielggadit Guovdageainnu suohkaniin.
– Mii leat ožžon fylkkamánnis birrasiid 300 000 ruvnnu mii galgá adnot dákkár čielggadeapmái. Mii leat ohcame fitnodagaid geat sáhttet fállat hatti dahkat dien barggu min ovddas, muitala Eriksen Balto.
Govven: Astrid Helander (vuorkágovva)
Buorre digaštallat
Son ii loga dan dahkat maidege jus vel Johttisápmelaččaid listtu ii leat mielas singuin searvat, jus nu orru šaddame.
- Lea beare buorre go oaivilat leat olbmuin, go dalle várra bohtet buot bealit ovdan. Galgá gal muitit ahte ii leat sáhka dán reforpmas movt heive rájiid sirdit, muhto movt mii bálvalit buorebut iežamet álbmoga. Go leat geargan Guovdageainnuin čielggadeamen, dalle galgá mis vel leat álbmotjienasteapmi dan alde galgat go searvat vai ii. Dat dieđus ii šatta ovdal boahtte giđa, muitala son, muhto ii áiggo dadjat gal gos suohkana hálddahus galggašii leat.
Ovttaoaivilis
Ovttain diŋggain leaba hui ovttaoaivilis sihke Eriksen Balto ja Buljo.
– Mun jáhkkán mii gal birget buoremusat ieža, eat dárbbaš searvat ovttain ge, lohká Anders S. Buljo.
– Mii gal eat dovdda dárbbu searvat ovttain ge, muhto sáhttit bargat buorebut ovttas gielddarájiid badjel, lea fas diehtu Anne Toril Eriksen Baltos.
