-Almmuhus-
OĐĐASATGuovdageainnu mohtorsearvvis ballet ahte eai beasa šat lágidit čáhcecrossa

Guovdageainnu mohtorsearvvis ballet ahte eai beasa šat lágidit čáhcecrossa

-

-

Maŋŋil go Dálkkádat- ja birasdepartemeanta ja Finnmárkku Fylkkamánni oaivvildit Kárášjoga ja Deanu gieldda rihkkon lága go adde Morten Blienii sierralobi vuodjit Deanu ráigge, de ballet mohtorsearvvis dás váikkuhusaid sidjiide maid.

Guovdageainnu mohtorsearvvi nubbijođiheaddji Anni-Rauna Triumf muitala Guovdageainnu mohtorsearvi lea farga guoktelot jagi lágidan skohtercrossa joga alde, ja seammá čáhci golgá Deanočázádahkii.

– In ádde áibbas váttisvuođa. Ádden dieđusge luossanáli áigot gáhttet, muhto go leat eará doalut eará jogain mii golgá seammá johkii de lea váttis áddet váttisvuođaid. Ballu lea ahte šaddet váikkuhusat min doaluide, ahte dá dat lei dat loahppa vuodjit skohterin čázi alde go departemeanta nu garrasit vuosttilda Morten Blien vuodjima. Mun gal doarjjun su máilmmiolahusa geahččaleame ollásit, eará riikkain addet vejolašvuođaid, nu lea mu mielas olles ášši imaš, lohká Triumf.

 

Váivi

Anni-Rauna Triumf mielas lea hui váivi jus Guovdageainnu gilvvuide bohtet váikkuhusat go departemeanta lea nu garrasit vuosttildan Deanu mohtorsearvvi doaluid.

– Balan ahte mis maid sáhttá šaddat váddásat lágidit doaluid ja oažžut sierralobi. Go mun in oainne stuorra erohusaid min gilvvuin ja máilmmiolahusa geahččaleame, go skohteriin vudjet jogas guktot doaluin, lohká Triumf.

 

Sihkkarvuohta čavgat

Anni-Rauna Triumf čilge sii nu go eará lágideaddjit atnet sihkkarvuođa duođalaččat, ja visot skohterat bassojit ovdal go besset searvat gilvvuide.

– In mun oainne dán áššis dan «Big deala», ja manin galgá leat nu váttis, imašta Triumf. Son čilge iežaset gilvvuin lea sihkkarvuohta čavgat, ja eará vuojánat nu mo fatnasat, eai beasa joga vuojašit go gilvvut leat.

 

Ášši duogáš

Deanu ja Kárášjoga gielda attii sierralobi Deanu mohtorsearvái ja Morten Blien máilmmiolahusa geahččaleame oktavuođas Deanočázádaga alde, gos Finnmárkku fylkamánni geahččalii guokte beaivvi ovdal bissehit olahusa.

Morten Blien vujii čakčamánnu 18. beaivvi 212 kilomehtera johkaráigge skohteriin ja nu bijai ođđa máilmmiolahusa vuodjit rabas čázis skohteriin, muhto Dálkkádat- ja birasdepartemeanta ii loga máilmmiolahusa lobálažžan, dán ášši birra čálii NRK Sápmi vuosttamužžan.

 

Gažada lea go čáhcecrossa maid lobiheamit

Deanu sátnejođiheaddji Frank Martin Ingilæ imašta go departemeanta ja fylkkamánni geavahit nu ollu návccaid áššái, ja lohká Deanu gielda lea geavahan seammá lága go eará gielddat, geat leat addán sierralobi lágidit čáhcecrossa jogas ja rabas čáziin Finnmárkkus.


SEAMMÁ LÁGA GEAVAHAN: Deanu sátnejođiheaddji Frank Martin Ingilæ deattuha iežaset geavahan seammá lága go eará gielddat geat leat addán sierralobi lágidit čáhcecrossa jogas ja rabas čáziin Finnmárkkus.
Vuorkágovva: Inga Marie Guttorm

 

Frank Ingilæ čujuha earret eará Guovdageainnus ja Mátta-Várjjagis lea maŋemuš logi jagi lágidan skohtercrossdoaluid rabas čázis. Ii ge Ingilæ loga doalut leamašan apmasat Finnmárkku fylkamánnái, guhte ii leat geavahan návccaid bissehit doaluid dahje dahkat gieldda vearredahkkin go leat addán sierralobi, nu mo dál Deanu gielda vásiha.

– Jus boađus lea ahte departemeanta oaivvilda ahte mii leat rihkkon lága, na dalle han eará gielddat maid leat rihkkon lága. Nu árvideames bohtet sidjiide maid váikkuhusat, go mus lea váttis oaidnit erohusa daid áššiin. Mun deattuhan ahte gielddas lea váldi addit sierralobi dakkár doaimmaide, ja imaštan baicce ahte eiseválddit dál geahččalit geanohuhttit gielddastivrra válddi, lohká Ingilæ.

 

Váttis oaivvildit skohtera leat čáhceskohterin

Son oaivvilda departemeanta dál berre čielggadit lobálašvuođa ja berre guoskat buot skohterdoaluide rabas čáziin.

– Munnje lea váttis oaidnit ahte skohter galgá čuovvut čáhceskohternjuolggadusaid. Iige mu oainnus leat nu dramatihkalaš sierralobiid addit eaŋkal doaluide. Mohtorvaláštallan lea stuorrumin ja jus áigot dahkat váddáseabbon addit sierralobiid de šaddet hástalusat maid hárjehallamiid oktavuođas. Lea roassun valáštallansuorgái, oaivvilda Ingilæ.

 

Doarju Ingilæ oainnu

Anni-Rauna Triumf doarju Frank Ingilæ čuoččuhusaid ahte Guovdageainnu doaluin ja Morten Blien máilmmiolahus geahččaleamis ii lean stuorra erohus. Son lohká iežas čuvvon ášši media bokte ja maiddái máilmmiolahus geahččaleame čakčamánus.

– Deanu gielda lea addán ovtta sierralobi vuodjit skohterin deanu alde, in mun ge sáhte oaidnit erohusa min doaluin ja Morten Blien vuodjimin. Mun gal imaštan manin dál fáhkka departemeanta ráhkada nu stuorisin ášši, loahpaha Guovdageaidnu mohtorsearvvi nubbijođiheaddji Anni-Rauna Triumf.

 

Ášši almmuhuvvui vuosttaš geardde báberáviissas 07.10.2015

-Almmuhus-