Sámediggeráđđi lea mearridan ruđalaččat doarjut Guovdageainnu kulturskuvlla prošeavtta «Min árbi».
Min Árbi – Vår arv lea viidodatprográmma ja álgooahpahus mii galgá veahkkin ovdánahttit hutkkálaš návccaid, fágalaš gelbbolašvuođa ja ovttasbargonávcca mii addá vuođu persovnnalaš hervvohallamii.
Min Árbi -prográmma ulbmil lea seailluhit sámi árbevirolaš máhtu ja ávnnaskeahtes kulturárbbi, ja seammás leat rabas min kulturárbbi ođasmahttimii. Dás galget oahppit ohcat dieđuid árbevirolaš máhtu birra ruovttus, lagasbirrasis ja servvodagas. Fáttát sáhttet leat luohti/lávlla, muitaleapmi, duddjon, borramušárbevierut ja luonddudoallu/oktavuohta lundui dahje eará áigeguovdilis fáttát.
Kulturskuvllat leat suohkaniid ja stáhta ovddasvástádus, ja Sámediggi ii láve addit doarjaga doaimmaid várás mat leat Kulturskuvllaid rámmaid siskkobealde. Dán oktavuođas Sámediggi spiehkasta ja addá ovttagearddedoarjaga Guovdageainnu suohkana Kulturskuvlii.
– Kulturskuvla lea okta dan moatti astoáiggefálaldagain suohkanis mii lea mánáid ja nuoraid várás, ja Kulturskuvla lea aitto sajáiduvvan. Danin lea dehálaš dán doibmii oažžut kontinuitehta, dadjá sámediggeráđđi Henrik Olsen (NSR).
Doarjja mii lea 200.000 ruvnno lea juolluduvvon Sámedikki Kulturdoaimmaid doarjjaortnegis, vuoruheamis “prošeavttat mat gozihit árbedieđuid ja ávnnaskeahtes kulturárbbi”.
