Áššis celkui duopmu odne, ja Skiellet diggegoddi áššehuhtii Guovdageainnu dievddu.
Áššis celkui duopmu odne, ja Skiellet diggegoddi áššehuhtii Guovdageainnu dievddu.
Goalmmátlot-jáhkásaš Guovdageainnu dievdu, gii lei áššáskuhtton goddán 20-jahkásaš Ruoŧa dievddu Morö Backe torgas, 4 kilomehtera Skielleha guovddážis eret, lea dál áššehuvvan.
Skiellet diggegoddi ádjánii golbma vahko cealkit duomu Skiellet goddináššis, gos okta goalmmátlot-jáhkásaš Guovdageainnu dievdu galggai gávppašit narkotihka guovtti Ruoŧa dievddus.
Sis ii lean narkotihkka liikká. Sii ledje áigon dájuhit Guovdageainnu dievddu ja su olbmás birrasiid 38 500 ruvnno, ja vaikke rivvet dan ruđa jus eará ládje eai oaččo.
Čukkohalai jámas
Guovdageainnu dievdu ja su olmmái eaba miehtan ruđaid addit ovdal go beasaiga oaidnit narkotihka, ja dalle vikkaiga Ruoŧa dievddut rivvet dan ruđa.
Goddon Ruoŧa dievdu fallehii Guovdageainnu dievddu niibbiin.
Guovdageainnu dievdu njuikii biillas olggos, ja nu doarráiga niibbiiguin, gos de čukkohalai dat Ruoŧa dievdu nu bahuid ahte varddii jámas.
Jáhkket čilgehussii
Skiellet diggegoddi jáhkká ahte Guovdageainnu dievdu ii leat iešmielat goddán dan Ruoŧa dievddu.
Sii maid lohket ášši oktavuođas boahtit dat ovdan ahte Guovdageainnu dievdu lea iežas gáhtten, ja de šaddan doarruma oktavuođas čuoggut dan nuppi gitta gahčaiga badjálaga ja son beasai luovos.
– Mun lean duhtavaš go leat jáhkkán mu klieantta čilgehussii, ja leat duohtavuođas dan bidjan vuođđun go duomu celke, lohká Guovdageainnu dievddu bealušteaddji, Jens Nystrøm.
Eai nagot čuvgehit
Duomus čállet maid ahte Ruoŧa dievdu lei stuorit go Guovdageainnu dievdu, ja Guovdageainnu dievdu doalai gállu Ruoŧa dievddu ratti vuostá go doaruiga, ja ii sáhte leat oaidnán lei go goddon Ruoŧa dievddus niibi gieđas vai ii.
Diggi maid ii loga čilgehusaid bokte dan ge nagodit ovttage čuvgehit lei go goddon Ruoŧa dievddus niibi vai ii, go lei sallafákkis Guovdageainnu dievdduin.
– Ii rievdat čilgehusa
Diggi čállá duomus ahte Guovdageainnu dievddu čilgehus lea hui jáhkehahtti, ja son ii vavddat čilgedettiin.
Goddondievddu olmmái, maid 20-jahkásaš Ruoŧa dievdu, ja dat guokte nieidda, eai nagot dikki mielas iežaset čilgehusáiguin čuvgehit ášši duođi eambbo.
Danin sii jáhkket ahte čilgehus maid Guovdageainnu dievdu lea buktán lea jáhkehahtti ja čuvgeha ášši doarvái bures. Dan čállá Skiellet diggegoddi duomus.
– Doppe lea seavdnjat leamaš. Ii okta ge leat sihkkarit maidege oaidnán. Danin maid eai leat diggi eahpidan mu klieanta čilgehussii, lohká Nystrøm.
Áktor áššis, Andreas Nyberg, ii lean oažžumis ságaide. Áššis lea golbma vahkku guoddalanáigemearri.
