Fefo ja Luonddubearráigeahču iskan čájeha ahte Guovdageaidnu geasuha eanemus guollebivdiid, ja eanas sis leat suopmelaččat.
Fefo ja Luonddubearráigeahču iskan čájeha ahte Guovdageaidnu geasuha eanemus guollebivdiid, ja eanas sis leat suopmelaččat.
Henrik Eira Stáda Luonddubearráigeahčus (SNO) ja Marit Eggen Fefos leaba leamaš iskame sáivaguollebivdiid Finnmárkkus guokte beaivvi, vuos Guovdageainnus, de Gággajávrris Porsáŋggus ja viidáseappot jávrriide mat leat meahcceluoddaguoras Lágesvuonduoddara guvlui.
Preassadieđáhusas čállá Fefo ahte sii leat iskan oktiibuot 13 guollebivdi geat buohkat ledje suopmelaččat. Ja buot lei ortnegis.
Rámpo suopmelaččaid
Eira dadjá sii leat deaivvadan ollu suopmelaččaiguin iežaset dárkkistemiin, ja rámpo suopmelaččaid leat ortnetolmmožin oaggunlobiid dáfus.
– Oppalaččat lea min vásáhus, sihke Fefo ja Luonddubearráigeahču bealis, ahte suoma bivdit hui hárve bivdet lobiheamit, lasiha Marit Eggen Fefos.
Guovdageaineatnu geasuha
Ledje eanemus guolásteaddjit Guovdageainnus. Eggen lohká ge sin vuordán ahte doppe sii deivet eanemus guhkemátkkálaččaid bivdime.
– Lea čájehuvvon ahte Guovdageainnu suohkan geasuha eanemus guollebivdiid. Suohkanis ledje measta 6000 bivdojándora 2015:s. Badjel 90 proseanta oggot geasset stávrráin, dadjá son ja Henrik Eira lasiha preassadieđus ahte oallugat oggot hárriid ja dápmohiid.
– Erenoamážit bisánit oallugat bivdit eanus Gievdneguoikka ja Máze gaskka, dadjá Eira.