Ávvir lea finadan iešguđetlágan bargosajiin Guovdageainnus, ja jearahallan movt sii ráhkkanit ja maid sii barget Sámi álbmotbeaivvi.
Sámi álbmotbeaivi ii leat ruksesbeaivi, muhto allaskuvllas ožžot bargiid virgelobi bálkkáin, buohcciidruovttus bovdejit oapmahaččaid sin lusa ávvudit ja suohkanbargit fertejit virgelobi ohcat.
Guovdageainnu buhcciidruovttu ávvudeapmi
Guovdageainnu buhcciidruovttu doaibmajođiheaddji Karen Marianne Gaup Sara muitala Ávvirii ahte juovllaide oaččui buhcciidruoktu bohccobierggu skeaŋkan, ja sii leat bivdán Jan Ole Buljo boahtit biđđit sidjiide.
– Dán jagi mii bovdet oapmahaččaid min lusa ávvudit Sámi álbmotbeaivvi, mii guossohit biđđosa, herskkostallet gáhkuiguin ja dieđusge lávlut «Sámi soga lávlaga». Mii čiŋahit stobu leavggaiguin ja ássit besset čiŋadit iežaset čikŋabiktasiiguin, muitala Gaup Sara.
Gaup Sara lohká maid ahte vaikko sii eai sáhte searvat almmolaš doaluide, de lea aŋkke dehálaš sidjiide juoga ládje čalmmustahttit Sámi álbmotbeaivvi.
Sámi allaskuvlla doalut
Sámi allaskuvlla rektor Laila Susanne Vars muitala sin bargit ožžot beallebeaivvi virgelobi bálkkáin vai besset searvat álbmotbeaidoaluide doppe gos sii leat barggus.
– Muđui leat mis iežamet doalut Diehtosiiddas Guovdageainnus gos bargit besset servvoštallat, mis galgá levgen ja mii lávlut «Sámi soga lávlaga», muitala Vars.
Vars muitala maid ahte sii leat bargame dainna ahte besset čájehit Sámi allaskuvlla filbmastudeanttaid filmmaid allaskuvlla bargiide.
Vars lea čakčat ožžon bovdejumi vuolgit Áltái, Romssa universitehta (UiT) doaluide doallat váldosártni.
– Mun vuolggán Áltái, Romssa universitehta (UiT) doaluide, go dovddan dat lea hui dehálaš ovttasbargoásahus midjiide, ja galggan ovttas UiT rektoriin Anne Husebekkain doallat váldosártni, muitala Vars.
Guovdageainnu suohkan
Guovdageainnu suohkana bargiin ii leat makkárge earenoamáš ávvudeapmi Sámi álbmotbeaivvi, muhto lávejit herskkostallat go lea gáffeboddu.
– Lea hui šállošahtti go Sámi álbmotbeaivi ii leat ruksesbeaivi, go mii eat sáhte giddet suohkanviesu, muhto suohkanbargiin lea vejolaš ohcat virgelobi jus áigot searvat Sámi álbmotbeaivvi doaluide. Suohkan vuoruha virgelobi bargiide geain leat mánát ja geat galget ráhkkanit doaluide Báktehárjjis, muitala suohkana bálvaluskantuvrra bargi Solveig Hætta.
