Guossit cealkán eret orrunsajiid unnán rievssahiid geažil

Go beakkehii ahte Finnmárkkus leat golmma geardde unnit rievssat go diibmá, ja FeFo dan vuođul gáržžidii bivddu, de leat Jergul Astu duottarstobus ollu guossit cealkán eret orrundiŋgojumiid maid ledje áigá juo diŋgon.

Jergul Asttu beaivválaš jođiheaddji John Edvin Holmestrand muitala sis leat 40 proseantta ovdagihtii diŋgojuvvon orrunsaji celkon eret.

– Rievssatbivdit, mat leat cealkán eret diŋgojumiid, leat lohkan midjiide lea danne go ožžot báhčit dušše golbma rievssaha, lohká Holmestrand.

Dovdo ruhtabursii

Golbma stuora joavkku juo leat cealkán eret orrumiid Jergul Asttus, ja Holmestrand lohká dan gal bures dovdot.

– Go dan mađe ollu olbmot geat orrot vahkku, de dat guđđet ollu ruđa, ja midjiide gal čuohcá dat garrasit ja dovdo bures.

Gáržžidan garrasit

Juohke čavčča čađaha FeFo rievssatlohkamiid, ja maŋŋel rievssatlohkanbohtosiid leat gárvásat, de lea FeFo bohtosiid vuođul mearridan gáržžidit bivddu garrasit.

Lohkanbohtosat čájehedje ahte lea golmma geardde unnit rievssat go diibmá lei, ja lohkkit maid leat oaidnán unnán rievssatčivggaid.

Mannan vahku logai FeFo meahccehálddašeaddji Even Borthen Nilsen Ávvirii ahte sii gáržžidit bivddu muhtun guovlluin mat leat dieđu mielde dat bivdoguovllut gos eatnasat háliidit bivdit, ja árvvoštallat giddet vierrobivdiide bivdokoartaoastima vuosttaš vahku bivddus.

– Olles Finnmárkkus lea čájehuvvon golmma geardde unnit rievssat go diibmá. 2015 čavčča lohkkojedje fylkkadásis 18 rievssaha juohke njealjádaskilomehteris, dán jagi dušše guhtta rievssaha.

Gáržžideapmi dan dihte buorre

Holmestrand lohká goitge buorren go bivdu lea gáržžiduvvon, vai báhcet rievssahat maŋit jagiide maid. Son muitala sii ožžo giđđat juo ollu diŋgojumiid, go ledje gullan ahte orrot ollu rievssahat.

– Ledjen ieš maid dalle oaidnán ahte lea ollu rievssat, muhto dál eai oidno šat nu ollu. Dieđusge dasa ii veaje maidege, ja danne lea buorre go gáržžiduvvo bivdu go čájehuvvo ahte lea unnán rievssat, lohká Holmestrand.

Eai cealkán eret

Guovdageainnu davábealde, Čunovuohpis, lea Madam Bongo duottarstohpu, ja leage guovllus gos FeFo árvvoštallet giddet vierrobivdiide bivdokoartaoastima vuosttaš vahku bivddus.

Duottarstobu eaiggát Mikkel Aslak Bongo ii loga mearkkašan nu ollu ahte Fefo lea gáržžidan bivddu.

– Mis eai leat cealkán eret guossit, ja leat baicca lassánan diŋgojumit, lohká son.

Bongo čilge soaitá leahkit danne go sus lea leamaš seamma rievssatbivdojoavku guossin 43 jagi, ja bohtet ruovttoluotta juohke jagi.

– Dalle gal álgojagiid bivde hui viššalit, muhto maŋŋel eai nu ollu beroš šat dan bivddus, dušše leahkit dán guovllus, lohká Bongo.

Imaš go jávke rievssahat

Bongo goitge imaštallá gosa rievssahat šadde, go beannot mánu áigi lea ieš oaidnán ollu rievssahiid.

– Dalle orro mu mielas hui ollu rievssahat, muhto go de lohke rievssahiid, de fáhkkestaga ledje unnán. Soaitá leahkit nu movt luomeáiggi láve, ahte olbmot oidnet guovžžaid, ja go rievssatbivdu lahkona de dieđihit unnán rievssahiid, árvvoštallá son.

Rievssatbivdu álgá čakčamánu 10. beaivvi.