Guorbmebiillas láhppui juvla vuojidettiin, ja surgehii biilavuoddji gean goasii deaivvai.
Guorbmebiillas láhppui juvla vuojidettiin, ja surgehii biilavuoddji gean goasii deaivvai.
Guovdageaidnulaččas Tom Hættas lei ilgadis vásáhus ikte veaigin go lei biillain jođus Kárášjohkii. Gaskal Šuoššjávrri ja Čoavddatmohki riikageainnu 92 alde bođii su ovddal guorbmebiila mas juste beasai okta juvla.
– Mun dieđusge goazastin go guorbmebiillaid maŋis láve guolddustit, ja go dat guorbmebiila lei mannan meaddel, de oidnen mii die boahtá maŋis dan. Álggos doivon ealga dat lea, muhto oidnen ahte juvla dat lea mii boahtá njuikku ovddal.
Lihkus ii deaivan
Hætta háhppehii jurdilit jápminlihkuhisvuođa birra mii lei gaskal Guovdageainnu ja Álttá muhtin jagiid áigi, go guorbmebiillas láhppui juvla.
– Jurddašin dál dáhpáhuvvá munnje seamma ládje, muhto juvla ii deaivan lihkus mu ja jorai badjel geainnu ja bisánii muohtaskálvái luoddabeallái.
Veaháš suorganii
Hætta bisánii de ja mieđiha ahte lei suorganan.
– Gal mun veaháš suorganin, ja jurddašin ahte ii livčče leaika jus deaivvahallat guorbmebiilla juvlii. Árvvoštalan juvlla deaddit lagabui čuođi kilo, ja go lea vel leahttu das, de deaddá vel eanet, lohká son.
(Ášši joatká gova vuolábealde)
Vujii várrogasat
Go Hætta vuoddjái das viidáseappot, de son juohke háve, go bođii ovddal guorbmebiillaid, goazastii eanet go dábálaččat láve.
– Ii dan dieđe goassige mii sáhttá dáhpáhuvvat, lohká son.
Vikkai dieđihit
Go joavddai Kárášjohkii, de son vikkai riŋget guorbmebiilafitnodahkii dieđihit juvlla birra.
– In ožžon vástádusa, inge jáhke sii leat fuomášan ahte juvla lea láhppon. Iige várra dahkan maidege guorbmebiilii, go ii leat gullon mihkkege lihkohisvuođaid, lohká Hætta.
