Guorbmebiila lea buollimin 10 kilomehtera eret Leavvajoga ja buollima geažil ii sáhte meattildit biillain.
Finnmárkku politiijaid operašuvdnaguovddáš dieđiha ahte buollinveahka, politiijat ja ambulánsa leat jođus báikái.
– Sii leat jođus báikái, ja lea oalle mátki vuodjit. Dat lea gaskal Kárášjoga ja Deanušalddi, dieđihit operašuvdnaguovddážis.
Ii leat olmmošvahát
Politiijat ožžo dieđu guorbmebiilabuollimis E6 geainnu alde birra dii. 1326.
– Ii leat jáhkkimis olmmošvahát. Guorbmebiila lei fievrrideamen borramuša. Diekkár guorbmebiillas lea stuorra dieseltáŋka mii dahká ahte sáhttá buollit bures, dieđiha politiijaid operašuvdnaguovddáš.
Báikkis čáskkadit
Buollinčáskadanbiillat ledje báikkis dii. 14.45 čáskadit guorbmebiilla mii lea buollimin.
– Lea guorbmebiila mii fievrrida borramuša mii lea buollimin, ja dat ii sáhte dahkat nu stuorra vahága, dadjá Kjartan Lunøe 110-Finnmárkku guovddážis.
Stáhta geaidodoaimmahat dieđiha ahte geaidnu lea gaskaboddasaččat gitta.
Buorre veahkki kránnjáriikkas
Son dieđiha ahte leat golbma buollinčáskadanbiilla báikkis dan olis.
– Buollinčáskadanbiillat leat boahtán sihke Kárášjogas, Ohcejogas ja Deanus. Mii oažžut buori veahki suopmelaččain, loahpaha Lunøe.
