Odne ja ihttin čoahkkanit 50 oasseváldi Sámi girkoeallima konferánsii Romsii, guorahallat leatgo sii doarvái fátmmasteaddjit.
Odne ja ihttin čoahkkanit 50 oasseváldi Sámi girkoeallima konferánsii Romsii, guorahallat leatgo sii doarvái fátmmasteaddjit.
Konferánsa fáddá lea diakoniija ja fátmmasteaddji sámi girkoeallima birra, ja lea ovttasbargu Sámi girkoráđi, Girkolaš oahpahusguovddáš Davvin (KUN) ja golmma davimus bismagotti gaskkas. Oasseváldit leat eaktodáhtolaččat ja bargit searvegottiin ja bismagottiin.
– Lea ovttaskasolbmo dovdu das ahte leago oassi oktasašvuođas vai ii, mii čájeha ahte leat go min beaivválaš doaimmat dakkárat ahte leat fátmmasteaddji vai eai, dadjá Sámi girkoráđi ráđđeaddi Tove-Lill Labahå Magga. Son deattuha ahte konferánsa čuvge girku iežas bargovugiid ja doaimmaid.
Ovttadássásašvuohta
Son čilge preassadieđáhusas ahte bargat fátmmasteaddji vugiin eaktuda eambbo sosiálalaš ja kultuvrralaš oktasašvuođa, eambbo heiveheami oktasaš olbmuide vai besset ollásit oasi váldit oktasaš doaimmain.
– Lea sáhka ovttadássásašvuođas, olmmošvuoigatvuođain ja ipmilriikka árvvuin. Dát fáddá čuvgejuvvo logaldallamiid, filmma, semináraid ja ságastallamiid bokte.
Golbma seminára
Bisma Olav Øygard rahpá konferánssa, ja Line Skum, Toril Edøy ja Berit Frøydis Svineng Johnsen leat váldologaldallit. Šaddá ságastallan filmma “Mu vuogi mielde – Edøyas máilbmái” vuođul. Edøy lea ráđđeaddi Girkoráđis ja leamaš mielde čalmmustahttit fátmmasteami girkuin maiddái riikkaidgaskkas dásis.
Lea eahketrohkos dasto Elverhøy girkus duorastat eahkeda. Golbma bálddalas semináras bearjadaga čuvgejuvvojit diakonalaš áššit ja doaimmat sierra sámi giellaguovlluin.
