Divttasvuona ovddeš leansmánni lea váidon go ii leat dutkan rohcošančuoččuhusaid. Ášši lea sáddejuvvon politiijaáššiid erenoamášovttadahkii.
Dán rádjái leat Divttasvuona áššis unnimusat 56 šigolašvuođaášši.
– Nordlándda politiijat ožžo disdaga dán vahkku váidaga Divttasvuona ovddeš leansmánni vuostá, muitala Nordlándda politiijaguovllu várrepolitiijameašttir Heidi Kløkstad.
Váidagis boahtá ovdan ahte váidi lea addán dieđuid Divttasvuona politiijaide seksuála rohcošeami birra mas lei galgat ceggejuvvot ášši.
Erenoamášovttadahkii
Ášši lea sáddejuvvon politiijaáššiid erenoamášovttadaga meannudeapmái.
– Ovttas Nordlándda stádaadvokáhtain lea mearriduvvon ahte eará áššit Divttasvuonas galget maid dutkojuvvot ja gieđahallojuvvot Nordlándda politiijaguovllus, čállá Kløkstad preassadieđáhusas.
Diggeášši Divttasvuona vuostá
Mánnodaga álggii diggeášši mas okta nisu lea váidán Divttasvuona suohkana ja gáibida badjel gávcci miljovnna ruvnno.
Nisu lea okta máŋgasis geat muitaledje VG aviisii rohcošemiid birra mat leat dáhpáhuvvan guhkit áiggi. Son gáibida buhtadusa go oaivvilda suohkan ii leat viežžan su eret ruovttustis.
Divttasvuona suohkana bealis dadjet ahte sii leat bargan dan maid sáhtte bargat dalle. Suohkana advokáhtta, Roald Angell, bivdá suohkana áššehuhttot ja ahte nisu ferte máksit áššegoluid ovddas.
Lassin šigolašvuođaáššiide, leat golbma áitinášši ja okta ášši mii lea čadnon eastadangeatnegasvuhtii.
NTB-Magnus Lutnæs Aas
