Ii goasse ovdal leat dahkkon gálvofievrredeami ektui nu stuorra guorahallan go dál leat álggahan. – Buot fievrredeamit luottaiguin, togaiguin, girdiiguin ja fatnasiiguin leat dehálaččat davvin, dadjá Stáhta geaidnodoaimmahaga direktevra, Per Morten Lund, gii jođiha stivrenjoavkku.
Dán stuora gálvofievrredanguorahallamis leat guokte guovddáš gažaldaga, namalassii mot galgá gálvofievrredeapmi leat Davvi-Norggas ja mot dat galgá leat veahkkin ahte olbmot sáhttet orrut ja bargat davimus guovllus? Danne guorahallet buot lágan fievrredemiid sihke luottaid, ruovdemáđiijaid, áimmu ja meara mielde.
– Fievrredeapmi sihke luottaiguin, togaiguin, girdiiguin ja fatnasiiguin leat dehálaččat, ja dat iešguđet lágan fievrredeamit gullet oktii. Danne guorahallat daid seamma guorahallamis, dadjá stivrenjoavkku jođiheaddji Per Morten Lund preassadieđáhusas.
Davvin leat ge guhkes gaskkat. Dasa lassin dagahit dálkkit ja uđasvárat hástalusaid fievrredemiide.
– Sihke ássit ja ealáhusat dárbbašit jođánet, sihkkareappot ja ráidnaset fievrredemiid go odne leat, dadjá Lund.
Dan guorahallamis gehččet maid Davvi-Norgga ruovdemáđiija guhkideami davas guvlui.
