Álbmotdearvvašvuođainstituhtta álggaha geahččalanprošeavtta Romssas ja eará stuorra gávpogiin.
Maŋŋel go almmoš koronaiskkadeapmi lea sakka unniduvvon, de ilbmet maid olu unnit dieđut koronanjoammundili birra.
Dál álggaha Álbmotdearvvašvuođainstituhtta geahččalanprošeavtta Romssas, Troanddimis, Bergenis, Oslos ja Ullensakeris/Gardermoenis. Sii áigot guorahallat koronanjoammuma duolvačázi bokte.
Daid gávpogiin váldigohtet iskosiid kloáhkas ja daid bohtosiid bokte galget gávnnahit lea go olu njoammun ja levvet go ođđa koronavariánttat.
Ruoŧas leat čađahan sullasaš prošeavtta badjel jagi, maiddái Dánmárkkus, Suomas ja Nederlánddas isket duolvačázi.
(©NTB)
