Turisttat geat váldojit suollefievrrideamis guoli, leat máksán dalán sáhku. Dat cuige organiserejuvvon rihkolašvuođa guvlui, oaivvildit tuollárat.
Fiskeribladet mielde leat 2,3 tonna guollefiléa duoguštuvvon guovtti mánus, mii dagaha 10 tonna guolleeari.
Tuollárat eai leat goassige ovdal fáhten nu ollu guollesuollefievrrideaddji.
Davvi-Norgga tuollárregiovnna dárkkistanhoavda Tom Olsen meidne ahte lea olu mii čujuha ahte dat sáhttá leat organiserejuvvon rihkolašvuohta.
Earret eará sáhttet leat máŋga suollefievrrideaddji geat vudjet fárrolaga ja leat jurddašan ahte okta biila galgá bissehuvvot.
– Mii fuomášat ahte sis lea vejolašvuohta máksit stuorra supmiid go bissehuvvojit, muhto maiddái dan vuogi mo rádjet guoli ja mo sii plánejit suollefievrrideami. Lea dego narkotihkkasuollefievrrideapmi, go vudjet máŋggain biillain fárrolaga, okta ofelastibiila vuodjá rájá rastá iskan dihte aktivitehta. Mii leat maid oaidnán kiloviissaid vakuumpáhkkejuvvon dorskefiléaid mat bálkestuvvojit meahccái justa ovdal rájáid, muitala Olsen.
Belgias vuvdet viidáset
Son muitala ahte golbma čehkkalačča váldojedje 338 kilo dorskefiléain, ja mákse 67 700 ruvdnosaš sáhku dalán.
Muhtin belgialaš turisttaid biillas gávdne tuollárat dan maid meidnejit leamen ámmátlaš vuovdinplakáhta, mas dorskefiléas lei haddi 150 ruvnno kilobealis.
Rádjá lea 20 kilo
Njuolggadusat dadjet ahte lea lohpi váldit mielde 10 kilo guoli dahje guollegálvvuid maid ieš lea oggon go mátkkošta Norggas olggos.
Jus lea oggon bagadallamis muhtin čálihuvvon guollegávpedoaimma ovddas, lea maksimála earri 20 kilo guolli dahje guollegálvvut, go eaktuduvvo ahte guolásteapmi sáhttá duođaštuvvot.
Dát njuolggadusat gustojit sihke norgalaččaide ja olgoriikalaččaide.
©NTB
