Dán geasi, nu go ovddit gesiid ge, lágida Ávvir oaggungilvvu mánáide ja nuoraide.
Ávvira sadjásaš neahttadoaimmaheaddji, Roy Arthur Olsen, sávvá buori oasálastima gilvui, ja illuda oaidnit mánáid ja nuoraid govaid ja fearániid.
– Lea hui somás gilvu masa lávejit oallugat searvat. Mii sávvat dán geasi ge beassat oaidnit ollu oaggungovaid ja lohkat somás oaggunvásáhusaid. Searvat oažžu vaikko guđiin guliin, leažžá dal mearas, jávrris vai jogas goddán dan. Eaktu lea ahte 2022 geasi lea goddán guoli, dadjá Olsen.
«Guollelihkku» oaggungilvu lea lágiduvvon máŋga jagi juo, ja gilvu láve buktit ilolaš lohkama.
– Mánáid oaggungilvvu gal mii fertet juohke geasi lágidit. Dasa leat min nuoramus lohkkit liikon bures. Mii leat 5-6 jagi juo lágidan dan ja juohke jagi leat mánát leamašan áŋgirat searvat gilvui, muitala Roy Arthur Olsen.
Bistá čieža vahkku
Roy Arthur muitala vel ahte juohke vahkku vuorbáduvvo okta vuoiti. Ja ii dasa galle, buot oassálastit ožžot vel juoidá go servet gilvui.
– Buohkat, geat sáddejit gova, ožžot skeaŋkkaža boastta mielde. Juohke vahkku vuorbádit vel oaggunstávrrá ovtta oasseváldái dan vahkku.
Ná searvvat «Guollelihkku» oaggungilvui!
Ávvira jahkásaš oaggungilvui sáhttet mánát ja vuollel 18-jahkásaš nuorat searvat. Govat almmuhuvvojit avvir.no siiddus ja Ávvira báberaviissas.
Deaddil dákko, searvva ja deavdde buot dieđuid!
Gilvvu njuolggadusat:
Gilvu álgá bearjadaga, suoidnemánu 4. beaivvi 2022, ja bistá gitta borgemánu 21. beaivái diibmu 24.00 rádjái.
Gilvui sáhttá searvat vaikko guđiin guliin, beare lea goddon oaggunstávrráin.
Guolli oažžu leat goddon vaikko gos, muhto ferte leat goddon 2022 geasi.
Juohke vahkku vuorbádit ovtta oasseváldi guhte dan vahkku lea dieđihan guoli, ja son vuoitá oaggunstákku. Sus lea dan vahkku «Guollelihkku».
Buohkat geat sáddejit guollegova ožžot skeaŋkkaža Ávviris. Muitte čállit iežat poastačujuhusa.
Loahpas geasi leat maid buohkat geat oassálastet mielde vuorbádeamis mas sáhttá vuoitit 1500 ruvnno árvosaš skeaŋkakoartta.
