Nu mo Ávviris lea guhká jo leamaš, de lea dán geasi maid «Guollelihkku» oaggungilvu mánáide ja nuoraide. Mana don ge oaggut, govves guoli ja sáddes gova midjiide.
Viimmat lea fas geassi, ja dál soaittat don ge oaggugoahtán. Juste dus soaitáge guollelihkku, jus fal gottát guoli, de sáddes Ávvirii gova, soaittát vel ođđa oaggunstávrrá vuoitit.
– Mii Ávviris illudit fas bidjat johtui dan min bivnnuhis oaggungilvvu «Guollelihkku» mii lea vuollel 18-jahkásaččaide. Mii leat dan olu jagiid jo lágidan ja mánát leat hui aŋgirat leamaš searvat. Hui somá go mii nagodit iežamet nuoramus lohkkiide maid juoga fállát, dadjá Ávvira neahttadoaimmaheaddji Máret Inger Aslaksdatter Anti.
Don soaittát liikot bivdit stuora hávggaid dahje soaittát baicca sáiddiid bivdit, beroškeahttá makkár guoli bivddát, de sáhtát searvat Ávvira gilvui!
– Dán gilvvus ii leat sáhka oažžut stuorámus guoli, dás lea eanet ahte mii háliidit oaggunmovtta ja luondduvásáhusaid baicca ovttaláhkái bálkkašit. Gilvui sáhttá searvat vaikko makkár guliin, vaikko man stuorra, vaikko man unna ja guoli oažžu vaikko gos bivdán jogas, mearas, jávrris dahje gos dal de bivdá, čilge Anti.
Álki searvat
Ávvira neahttasiiddus gávnnat hui oidnosis gilvvu. Go de rabat gilvvu, de lasihat gova, deavddát dieđu guoli ja guollebivdi birra ja de sáddet dan.
Máret Inger ávžžuha mánáid ja nuoraid sáddestit guollegova ja lohpida buohkaide geat sáddejit guollegova skeaŋkkaža:
– Dat doaibmá nu ahte juohke okta, gii sádde guollegova midjiide, oažžu skeaŋkkaža Ávviris ja dat skeaŋkkaš soaitá guoskkat oaggumii juogaládje, dadjá Anti.
Juohke vahkkku lea maid vejolaš vuoitit oaggunstávrra:
– Mii vuorbádit oaggunstákku vuoiti sin gaskkas geat dan vahku leat sádden guollegova, nu ahte juohke vahku oažžu okta mánná oaggunstákku mis, muitala Anti.
Searvva don ge!
Buot mánát geat sáddejit gova guolis ja dieđuid dan birra leat maid mielde skeaŋkakoartta vuorbádeamis.
– Go de loahpahit gilvvu loahpas geasi, de mii vuorbádit skeaŋkakoartta buot mánáid gakkas geat leat sádden gova ja searvan min gilvui. Skeaŋkakoartta árvu lea 1 500 ruvnnu ja mii gulahallat dieđus mánáin ja váhnemiiguin gos dat háliida dan skeaŋkakoartta, čilge Anti.
Ávvira geassebargi, Berit Alice Utsi, illuda oažžut dus govaid ja oaidnit makkár guliid don bivddát.
– Mun gal nu illudan oažžut govaid mánáid guliin, ja sávan ahte bohtet ollu govat! Mus leat fiinna skeaŋkkažat buot mánáide geat munnje sáddejit govaid ja mun vuorbádan maid oaggunstávrrá vuoiti juohke vahku. Ávžžuhan buohkaid searvat gilvui, dadjá Utsi.
– Mii ávžžuhit maid váhnemiid veahkehit mánáid sáddet govaid, ja sávvat ollu lihku buot mánáide, soaitá dus nu lihkku ahte vuoittát oaggunstávrrá dahje jo skeaŋkakoartta! Lihkku oaggumiin buohkaide, loahpaha Anti.
Gilvvu njuolggadusat
Gilvu álgá mánnodaga, geassemánu 21. beaivvi 2024, ja bistá gitta borgemánu 18. beaivái diibmu 24.00 rádjái.
Gilvui sáhttá searvat vaikko makkár guliin, beare lea goddon oaggunstávrráin.
Guolli oažžu leat goddon vaikko gos, muhto ferte leat goddon 2024 geasi.
Juohke vahku vuorbádit ovtta oasseváldi guhte dan vahkku lea sádden gova guolis, ja son vuoitá oaggunstávrrá. Sus lea dan vahku «Guollelihkku».
Buohkat geat sáddejit guollegova ožžot skeaŋkkaža Ávviris. Muitte čállit iežat poastačujuhusa.
Loahpas geasi leat maid buohkat geat oassálastet mielde vuorbádeamis mas sáhttá vuoitit 1500 ruvnno árvosaš skeaŋkakoartta.
