-Almmuhus-
-Almmuhus-
GUOLLELIHKU Guollelihkku Gunnarvuonas

Guollelihkku Gunnarvuonas

-

-

Tor Máhtes lei albma guollelihkku mannan vahkku go gottii smávvasáiddi Gunnarvuonas. Gova sáddii son Ávvira mánáid- ja nuoraidoaggungilvui ja vuittii oaggunstávrrá.

Juohke vahkku vuorbádit mii ovtta vuoiti sin gaskkas geat leat sádden oaggungova Ávvirii. Vuoitu lea oaggunstávrá. Mannan vahkku sáddeje ovcci máná oaggungovaid Ávvirii. Tor Máhtte šattai dat guhte oaččui ođđa oaggunstávrrá mainna beassá eanet oagguntuvrraide vuolgit.

– Lei hui suohtas vuoitit ođđa oaggunstávrrá, lohká Tor Máhtte Anti.

Oagguntuvrras bearrašiin

 Son lei bearrašiin Gunnarvuonas Čorgasis oagguntuvrras gos sii dávjá lávejit oaggut.

– Mun ledjen mu bearrašiin vuolgán oagguntuvrii ja go leimmet sullii njeallje diimmu oggon de fáhkka dohppii guolli vuggii, muitala Tor Máhtte Anti.

Guolli mii dohppi vuggii lei smávvásáidi mii dettii vuollel kilo. Maŋŋel go máŋga diimmu ledje bivdán de lei hui suohtas dovdat ahte viimmat leat juoidá darvehan vuggii.

– Go guolli dohppi vuggii mun álgen smiehttat makkár guolli son dá lea ja álgen geassit dan gáddái. Ja gáddái gal ožžon dan guoli álkit hoavain, lohká Anti.

Go Tor Máhtte oaččui guoli gáddái de beasai čollet dan ja váldit mielde ruoktot. Su oabbá guhte maid lei mielde oagguntuvrras gottii maid guoli. Dat lei mearrarávdu. Tor Máhtte ii loga vuos málestan, muhto dasa gal illuda.

Stuorámus guolli

Tor Máhtte lea hui áŋgir oaggut ja lohká iežas dávjá oaggumen. Son muitala fearana dalle go hirbmat stuora guolli dohppi vuggii.

– Mun ledjen Storfossenis oaggumen go de dohppi guolli vuggii. Ja dat lei oba gievra gaikut ja bargen guhká oažžut gáddái. Dat lei dat stuorimus guolli maid goasse lean goddán. Dettii sullii golbma kilo, lohká Tor Máhtte.

Dál lohká áŋgiris guollebivdi illudit oažžut ođđa oaggunstávrrá Ávviris maid beassá nuppi oaggunmátkái váldit mielde. De beassá geahččalit stávrrá.

- Advertisement -
-Almmuhus-