June Sommer Strask lea geahččalan feara makkár ámmáhiid ovdal go čálligođii girjjiid. Dál almmuha ođđa mánáidgirjji man lea gohčodan «Giegačivga Filius».
June Sommer Strask lea geahččalan feara makkár ámmáhiid ovdal go čálligođii girjjiid. Dál almmuha ođđa mánáidgirjji man lea gohčodan «Giegačivga Filius».
– Dát lea máinnas giegačivgga Filiusa birra, mo son fuomáša gii son lea ja dohkkeha dan, čállá Iđut lágádus preassadieđáhusas.
Ii leat earáid láhkai
Giegačivga Filius ii leat eará giegaid láhkai. Son ii liiko go su gohčodit giehkan dahje veaigeloddin. Son han lea niitocivkkán. Filius hárjehallá girdit.
Ovtta beaivvi de geavvá nu ahte ii dádjat šat ruoktot.
– Ozadettiin beasi deaivida vaikko makkár dáhpáhusaid. Son dovdá iežas oarbbisin ja borranmiella maid livččii. Áibbaša iežas beassái. Filius doaivu gávdnat eatnis. Ja oza son de maŋážassii gávdná – muhto ii dan maid lei ohcamin, nie dat lágádus čilge girjji birra.
Goalmmát mánáidgirji
June Sommer Strask almmuha dál iežas goalmmát mánáidgirjji, máidnasa Giegačivga Filius/Gjøkungen Filius, mii lea sihke sáme- ja dárogillii.
Strask almmuhii iežas vuosttaš mánáidgirjji «Byttingene/Lonuhas- gánddaguovttos» jagi 2004.
Son lea almmuhan mánáidgirjji «Elva og vakkerfuglen / Johka ja hearvaloddi», romána «Fandens friller», nuoraidromána «Ravnejuvets hemmelighet 1: Leonora», ja jietnagirjjiid «Haldde – inn i huldrenes rike», ja «Stallo». Sus lea čálus Jul i nord-antologiijas. Su vuosttaš novealla almmuhuvvui 1995:s.
Jagi 2004 son vuittii HATS monologagilvvu Binnesang-nammasaa monologain.
– Son lea bargan duon ja dán – guollečuohppin ja šibitdikšun, girjerájushoavdan ja katekehtan, čállá lágádus.
Buot ahkásaččaide
Máret Sárá lea jorgalan teavstta. Dát lea girji buot ahkásaš mánáide.
Sissel Horndal lea tevdnen girjji govaid. Sus lea oahppu Statens Kunsthøgskole i Bergen -ásahusas ja Nordland Kunst- og Filmskole i Kabelvåg -ásahusas.
Horndal lea sárgon govaid máŋga dárogiel ja sámegiel girjái, ja son lea ieš almmuhan mánáidgirjjiid. Son oaččui Blix-bálkkašumi 2015:s.
Tevdnejeaddji Sissel Horndal oktan girječálliin Signe Iverseniin nominerejuvvuiga Davviriikkaid Ráđi mánáid- ja nuoraidgirjjálašvuođabálkkašupmái 2013 girjjiin Mánugánda ja Heike (Iđut 2011).
Iđut almmuha Giegačivga Filius / Gjøkungen Filius. Sámediggi lea ruhtadan girjji almmuheami.
