Riikkadássásaččat leat dušše golbma proseantta guolásteddjiiguin nissonat. Dán geasi nuoraidguolásteamis lea sohkabealledeaddu áibbas eará.
Ealáhus ja guolástusdepartemeanta bovdii dán jagi fas nuoraid dieđihit iežaset Guolástandirektoráhttii, guolástit. Dán rádjái leat 466 nuora dieđihan, ja 163 sis leat nieiddat.
– Hui somá
– Mii bargat strategalaččat vai nissonlohku lassánivččii, ja lea hui somá go ná olu nieiddat leat dieđihan sii áigot searvat guolásteapmái dán geasi, nu dadjá Ealáhus- ja guolástusdepartemeanta stádačalli, Kristina Sigurdsdottir Hansen.
Ortnet lea sidjiide gaskal 12 ja 25 jagi. Juohke oasseváldis lea vejolašvuohta 50 000 ruvnno ovddas vuovdit guliid.
Romssas ja Finnmárkkus eanemus dieđiheaddjit
Dán jagáš nuoraidguolásteapmi lea juo álgán. Romssas ja Finnmárkkus leat 233 dieđiheaddjit, ja leage maid de dat fylka mas leat eanemus dieđiheaddjit.
Innlandet, Agderis, Vestfoldas ja Telemárkkus leat unnimus dieđiheaddjit.
