Dialogakonferánssas ledje hirpmahuhtti oallugat.
Birrasii 40 olbmo 20 iešguđet fitnodagas ledje Hámmárfestii boahtán dialogakonferánsii Hámmárfeastta ođđa buohcceviesu birra.
– Hirpmahuhtti oallugat. Eai boađe gal gitta Hámmárfestii jus ii leat beroštupmi searvat prošektii, lohká Christian Brødreskift Sykehusbyggas.
Entreprenevrrat gávnnadit
Konferánssa ulbmil lei juohkit dieđuid bargoaddi dárbbuin ja maid oažžut dieđuid movt gokčat earenoamáš dárbbuid márkanis. Lei maiddái arena entreprenevrraide ja ráđđeaddiide gávnnadit.
Finnmárkku buohcciviesu prošeaktahoavda Lill Gunn Kivijervi jugii dieđuid Finnmárkku buohcciviesu birra ja makkár prošeavttat leat jođus.
– Mii leat ovdanbuktán bohtosiid mat bohtet buori proseassas. Šaddá buorre buohcceviessu, lohká Lill Gunn Kivijervi.
Sávvet ráđđeaddiid
Sykehusbygga prošeaktajođiheaddji Christian Brødreskift muitalii eambbo konseapta birra ja viidáset proseassa birra.
– Dábálaččat eai boađe entreprenevrrat ná árrat mielde, muhto mii háliidit sin árrat fárrui. Ferte buorre oktavuohta entreprenevrrain, arkiteavttain ja huksenhearráin, lohká Brødreskift.
Ožžo buori responssa, ja maŋŋel go guokte diimmu ledje vuos ádjánan čađahit prošeavtta, de besse buot entreprenevrrat sierra ságastallat Finnmárkku buohcciviesuin, Hámmárfeastta suohkaniin ja Romssa universitehtain.
Fargga almmuhuvvo haddegilvu. Huksen lea plánejuvvon álgit 2020:s. Prošeavtta ruhtarámma lea 1,95 miljárdda.
Buohcceviessu galgá gárvvis pasieanttaide 2024:s.
