-Almmuhus-
OĐĐASATGuokte skuvlla vuite čurvestatgilvvu eastadit givssideami

Guokte skuvlla vuite čurvestatgilvvu eastadit givssideami

-

-

Raavrhvijhke ja Kárášjoga skuvlla oahppit vuite gilvvu buoremus čurvestagain givssideami vuostá. Sámediggepresideanta Vibeke Larsen lea rámis go ohppiin leat nu buorit miellaguottut.

Sámediggi oaččui oktiibuot 12 evttohusa Guovdageainnu, Máze, Kárášjoga, Deanu, Álttá, Raavrhvijhke ja Hársttaid skuvllain čurvestatsátnegilvvus givssideami vuostá.

Buot oahppit, geain lea sámegieloahpahus skuvllas, bovdejuvvojedje searvat gilvui diimmá čavčča, čállá Sámediggi preassadieđáhusastis.

 

Buot evttohusat ledje hui buorit

Raavrhvijhke skuvlla čihččet luohká sámi oahppit, ja dasto oktasaš evttohus Kárášjoga skuvlla 9a ja 9á ohppiin válljejuvvojedje vuoitin čuoládatsátnegilvvus.

Jurya cealká ahte buot evttohusat ledje hui buorit, muhto ahte vuoitočuoládatsániin lei dat erohus ahte dat ledje searvvaheaddji, oanehaččat ja dárkilat ja ahte bokte buriid dovdduid juryas.

 

Vuoitočurvestagat leat čuovvovaččat:

1. Haaj, voelpe – Hei, kompis.

2. Edtjebe maam joem hæhtadidh? – Skal vi finne på noe?

3. Luste datnem vuejnedh – Hyggelig å se deg.

4. Jorgal gatnjaliid bohkosin – snu tårer til latter

5. Don leat áibbas buorre niego don leat – Du er perfekt som du er

6. Leage leat ieš, earát leat jo váldon – Vær deg selv , alle andre er tatt


Sámediggepresideanta Vibeke Larsen.
Preassagovva

Duddjot buriid oktavuođaid

Sámediggepresideanta Vibeke Larsen lea rámis sin dáfus geat serve gilvui, geain lei áigumuš buoridit loaktima skuvllas ja eastadit givssideami.

 Go bidjá fokusa ahte galgat leat burežat gaskaneamet, doaivut mii ahte mii leat buktimin buriid oktavuođaid báikkálaččat skuvllain ja ahte oahppit šaddet dihtomielalažžan fáttá birra. Evttohusat maid mii oaččuimet, čájehit ahte sámi ohppiid gaskkas leat buorit miellaguottut, dadjá sámediggepresideanta Vibeke Larsen.

Vuoitočurvestagat deaddiluvvojit máinnusplakáhttan mat addojuvvojit oasseváldi skuvllaide.

Dasa lassin juogadeaba vuoitoluohkkáguoktá 10 000 ruvnnusaš vuoittu.

 

Veahkehit skuvllaid eastadanbarggus

Sámediggi lea mielde nationála barggus «Searválaga givssideami eastadeamis» mii bistá jahkái 2020.

Sierra aktevrrat ja searvvit leat ovttas Oahpahusdirektoráhtain ja ráđđehusain stáhtaministara Erna Solberg ja máhttoministara Torbjørn Røe Isaksen bokte, vuolláičállán šiehtadusa mas geatnegahttojuvvojit bargat ovttas addin dihtii mánáide ja nuoraide buori oahppanbirrasa ja bajásšaddanbirrasa.

Čurvestatgilvu givssideami eastadeamis Sámedikkis lea oassi dán barggus.

– Mii háliidat dáinna gilvvuin veahkehit skuvllaid bargat givssideami ja loavkašuhttima vuostá skuvllain. Buot mánát ja nuorat ánssášit buori skuvlabirrasa, dadjá Larsen.

 

Jurylahtut

Jurys leat leamaš: Sámediggepresideanta Vibeke Larsen, bajásšaddan-, fuolahus- ja oahppolávdegotti nubbijođiheaddji Lars Oddmund Sandvik, Sámedikki nuoraidpolitihkalaš lávdegotti jođiheaddji Ánná Káisá Partapuoli ja Kárášjoga Sámi joatkkaskuvlla ohppiidráđi lahttu Aina Madelen Aslaksen Gaup.

-Almmuhus-