Odne eahkedis almmuhuvvojit Davviriikkaid ráđi girjjálašvuođabálkkašumiid vuoitit.
Koronadili dihte eai sáhttán lágidit bálkkašumiid juohkindilálašvuođa Islánddas nu go lei plánejuvvon. Dán jagi juhket buot bálkkasumiid neahta bakte.
Guokte sámi girjji sáhttet vuoitit Davviriikkaid ráđi girjjálašvuođabálkkašumi odne. Dávviriikkaid ráđi ruhtabálkkašumiid evttohassan lea Niillas Holmberg su girji ovddas diktačoakkáldagainis «Juolgevuođđu» (2018). Davviriikkaid ráđi nuoraid- ja mánáidgirjjálašvuođa bálkkašumis gilvaleaba Karen Anne Buljo ja Inga-Wiktoria Påve girjjiin «Guovssu guovssahasat» (2019)
– Dál lea kultuvra ja dáiddárat ja din doaimmat earenomáš dehálaččat dán áiggis goas fertet doallat gaskka, de mii ávvudit sin digitálahámis, lohká Davviriikkaid ráđi presideanta Silja Dögg Gunnarsdóttir Davviriikkaid ráđi neahttasiiddus.
Davviriikkaid ráđi girjjálašvuođabálkkašupmi lea juhkkojuvvon 1962 rájes. Dasa lassin juhkkojuvvojit musihkka-, biras-, filbma- ja mánáid- ja nuoraid girjjálašvuođabálkkasumit. Vuoitit ožžot Nordlys-bálkkašupmebácci ja 350 000 Dánmárkku ruvnnu. Davviriikkaid ráđi viđa bálkkašumis gilvalit oktiibuot 51 barggu, álgaga ja dáiddára.
Dáppe sáhtát geahččat njuolgasáddaga mii álgá 21.10 disdaga eahkedis.
