Gaskavahku báhččojedje guokte gumppe Osdalguovllus, Østerdalenis.
– Goalmmát gumpe manai báhčasiidda, ja dál leat ohcame ealli, lohká Ståle Sørensen, Hedemárkku fylkkamánnis NRK:ii.
Jahkemolsašumis álggii gumpebivdu, ja dán rájes leat vihtta gumppe báhččon.
Stuoradiggi lea addán lobi báhčit oktiibuot 42 gumppe miehtá riikka, ja 16 gumppe Hedemárkkus.
Olu gumppet
Birrasii 100 báikkálaš bivdi leat bivddus gumpeguovllus Hedemárkkus. Guokte valvvi galget báhččot, Osdalguovllus ja Julussaguovllus.
Dá lea stuorámus gumpebivdu Norggas, dan rájes go gumpe ráfáiduvvui 1973:s.
Stevdnen
Máilmmi birasfoanda (WWF) stevdnii stáda go oaivvildit bivdu rihkku lága.
Oslo diggegoddi mearrida dán vahkku, lea go bivdu lobálaš.
(©NTB)
