Girona LKAB ruvkkes leat leamaš guokte seismalaš dáhpáhusa disdaga eahkesbeaivvi ja mannan ija.
Vuosttaš eanandoarggastus dáhpáhuvai eahkesbeaivvi disdaga ja lei garas. Lei magnituda 2,2 richterskálas ja dovdui Girona gávpogis, dieđiha LKAB ruvke neahttasiiddus.
Mannan ija doarggistii eanan Girona ruvkkes, dál 1.6 richterskálas.
– Ruvkkes ledje guokte garra eanandoarggastusa, ja doppe gos eanan doarggistii, lea dál giddejuvvon. Ii oktage olmmoš roasmmohuvvan, dieđiha LKAB fitnodaga gulahalli Per Juntti.
