Ovtta vuoras olbmos Čáhcesullos lea duođaštuvvon koronavirus, ja lea dál divššus Girkonjárgga buohccieviesus.
Čáhcesullo sátnejođiheaddji Wenche Pedersen duođašta ahte suohkanis lea ovtta olbmos duođaštuvvon koronavirus. Iskanboađus čielggai distateahkeda.
– Pasieanta lea vuorrasit olmmoš, ja lea dál divššus Girkonjárgga buohcceviesus. Suohkandoavttir lea álggahan guorrat movt dávda lea njommon, ja mii váldit oktavuođa buohkaiguin geaidda jáhkkit virus sáhttá njommon, ja addit dieđuid maid sii galget dahkat. Dat mearkkaša ahte olbmot, geat eai gula maidege dearvvašvuođadoaimmahagas, eai dárbbaš jurddašit dan njoammuma birra. Suohkandoavttir maid muittuha ahte lea dehálaš doalahit nubbái 1-2 mehtera gaskka, bissut ruovttus nu olu go vejolaš, ja bassat gieđaid dávjá. Dat lea eastadanbargu masa olles servvodat ferte veahkkin, čállá son.
Viđas erremis Unjárggas
Unjárggas lea maid okta olmmoš duođaštuvvon koronavirusiin. Gielddadoavttir Kjell Magne Johnsen muitala Ávvirii ahte dat olmmoš sáddejuvvui buohccevissui juo duorastaga mannan vahkkus, ja mánnodateahkeda duođaštii iskkus ahte sus lea covid-19.
Unjárggas leat vihtta olbmo dearvvašvuođabargguin erremis, go lea leamaš lagas oktavuohta dáinna olbmuin.
– Sii leat biddjon erremii go lea leamaš oktavuohta njoammuduvvon olbmuin dearvvašvuođadivššu olis. Eat leat nagodan gávdnat gos dahje geas dávda lea njommon dán olbmui. Muđui leat mis olu olbmot geain leat nuorvomearkkat, ja ollusat leat ieža mearridan ahte mannet erremii eastadan dihte njoammuma, dadjá gielddadoavttir.
Johnsen muitala sii leat ollusiid iskan dán vahkkus. Unjárggas leat ikte distaga 24 ođđa olbmos iskan leat go ožžon virusa, ja vurdet bohtosiid čielgat bearjadaga.
116 maŋemus jándora
Olles Norggas lea dál, njukčamánu 18. beaivvi, oktiibuot 1423 olbmos duođaštuvvon koronavirus. 116:s sis leat duođaštuvvon maŋemus jándoris, namalassii distaga diibmu 00.00 gitta 24.00.
Dál leat Norggas iskan oktiibuot 28 522 olbmo.
