Yle Sámi hoavda Pirita Näkkäläjärvi lea guođđán virggistis Maria Saijets háldui jahkái. Neahttacielaheamit maid lea vásihan, lohká leat okta sivvan dasa go dál váldá bottu.
Yle Sámi hoavda Pirita Näkkäläjärvi lea guođđán virggistis Maria Saijets háldui jahkái. Neahttacielaheamit maid lea vásihan, lohká leat okta sivvan dasa go dál váldá bottu.
Njeallje jagi dassái virgáduvvui Pirita Näkkäläjärvi Yle Sámi hoavdan, dat áigi ii leat leamaš dušše geahpas.
Dál jávká son jagi virggistis, go manná oahppolupmui Londonii, gos áigu lohkat Media and communications fága masterdásis.
– Mun lean olahan dál daid mihtuid maid álggus bidjen dalle go álgen hoavdan, dasa lassin leat sisáibmováttisvuođat ja neahttagivssideapmi maid váikkuhan dán mearrádussii. Dasa lassin lean mun dakkár guhte juohke 3.-4. jagi gáibidan juoidá ođđa vásihit, čilge Näkkäläjärvi.
Eurohpá buoremus skuvla
Londonii ii dolle okto, muhto dohppesta irggis vel fárrui, guhte maid áigu studeret stuorragávpogis, iige Näkkäläjärvi leat vaikke makkár skuvlii álgimin.
– Dat lea London School of Economics. Mun lean veahá iskan dan skuvlla ja dat lea goalmmádin buoremus máilmmis ja buoremus skuvla Eurohpás, nu ahte dát gal lea buorre sadji viežžat lassi návccaid Yle Sámi bargui, lohká ieš.
Sávvá Saijetsii bargoráfi
Pirita lea ovdalaččas muitalan lossa vásáhusaidis birra Ávvirii, mas muitalii ahte lei buohccindieđihuvvon neahttacielahemiid geažil.
Dál go guođđá virggis Maria Saijetsii, de sávvá su oažžut bargoráfi.
– Hui váttis diehtit šaddá go son maid gierdat neahttacielahemiid, muhto mun sávan ahte son oažžu bargoráfi go lea dehálaš bargu maid mii dahkat. Mun sávan maid ahte son oažžu servodaga doarjaga ja fitnodaga doarjaga jus dakkár dillái boađášii, lohká son.
Näkkäläjärvi rámida Saijetsa:
– Ledne ovttasbargan guhká ja son gal dovdá dili, sus lea guhkes vásáhus mediamáilmmis. Mus lea hui buorre dovdu, lean ilus go su válljejedje mu sadjásažžan. Son lea juste rivttes olmmoš dása ja mun vuorddán olu ovdáneami dan áiggis go mun jávkkan, erenoamážit tv-bealde, lohká Näkkäläjärvi.
Loga maid: Yle Sámis váttisvuođat
Loga maid: – Fertejin váldit bottu
Ii lohpit máhccat
Go jearan ahte sáhttá go dáhkidit ahte máhccá fas Yle Sámi hoavdastullui, de vástida ná:
– Dan han ii goassege dieđe, muhto dat lea mu niehkobargu ja mu «passion». Iežan masterbarggu lean maid jurddašan laktit sámi mediaid.
Son dattege lohká alddis leat buori dovddu dál.
– Dál beasan jagi smiehttat dušše iežan birra, lean logi jagi leamaš bargoeallimis dál. Lea maiddái lossa ovddasvástádus gozihit ahte muitalat go rivttes áššiid ja ahte olbmuin lea diehtu dehálaš vuoigatvuođaaáššiin mat gullet sápmelaččaide. Váldomediat han eai gozit dan, lohká Pirita Näkkäläjärvi.
